"Prezident-xalq-ordu birliyi, həmrəyliyi Böyük Qələbənin qazanılmasında müstəsna rol oynadı" - Ramin Şərifov

"107-ci ildönümünü böyük qürur hissi ilə qeyd etdiyimiz Silahlı Qüvvələrimiz 44 günlük Vətən müharibəsində tək ərzi bütövlüyümüzü bərpa etmədi, həm də dünyaya əsil müharibə mədəniyyətini nümayiş etdirdi".

Bunu Sonxeber.az-a danışan Kiçik və Orta Biznes Subyektləri və Klublarının Assosiasiyası (KOBSKA) İdarə Heyətinin sədri Ramin Şərifov bildirib.

Ramin Şərifov qeyd edib ki, təməli 1918-ci il iyunun 26-da qoyulmuş Azərbaycanın Silahlı Qüvvələrinin formalaşdırılmasında və inkişafında Ulu Öndər Heydər Əliyevin müstəsna xidmətləri olub:

"Ulu Öndər 1993-cü ildə xalqın təkidli tələbi ilə yenidən siyasi hakimiyyətə qayıtdıqdan sonra da dövlətçiliyin əsas sütunlarından biri kimi güclü və peşəkar ordu quruculuğunu qarşıya başlıca məqsəd kimi qoymuş və buna nail olub. Hələ ondan öncə bilirsiniz ki, ulu öndər Heydər Əliyevin təşəbbüsü ilə 1971-ci ildə Azərbaycanda hərbi kadrlar hazırlayan və görkəmli sərkərdə Cəmşid Naxçıvanskinin adını daşıyan hərbi lisey yaradılıb. Bundan başqa ümumilli lider Heydər Əliyev o dövrdə milli zabit kadrların hazırlanması üçün SSRİ-nin digər hərbi məktəblərinə güzəştli şərtlərlə qəbul olunmaları üçün də bir çox işlər görüb. Heç kəsə sirr deyil ki, Azərbaycan Silahlı Qüvvələrin formalaşmasında Cəmşid Naxçıvanski adına Hərbi Liseyin yetişdirdiyi milli zabit kadrlarımızın müstəsna rolu var.

Müstəqilliyimizin bərpasının ilk illərində nizamlı ordudan danışmaq mümkün deyildi. Müxtəlif hərbi dəstələr ayrı-ayrı qüvvələr tərəfindən idarə olunurdu. Bundan istifadə edən düşmənin torpaqlarımıza təcavüzü getdikcə daha geniş miqyas alırdı. Azərbaycan müstəqilliyini itirmək təhlükəsi ilə üz-üzə qalmışdı. Belə bir ağır vaxtda xalqın təkidli tələbi ilə hakimiyyətə qayıdan Ulu Öndər Heydər Əliyev digər sahələrdə olduğu kimi, ordu quruculuğunda da mühüm addımları ilə yeni mərhələnin əsasını qoydu. 1994-cü il mayın 12-də atəşkəs haqda müqavilə imzalandıqdan sonra Azərbaycan Silahlı Qüvvələrinin formalaşması daha da sürətləndi. Həyata keçirilən uğurlu siyasət nəticəsində Silahlı Qüvvələrin maddi-texniki təminatının yaxşılaşdırılmasına, şəxsi heyətin mənəvi-psixoloji hazırlığının artırılmasına və döyüş ruhunun yüksəldilməsinə xüsusi diqqət ayrıldı. Ulu Öndər Heydər Əliyevin 22 may 1998-ci il tarixli Fərmanına əsasən, Əlahiddə Azərbaycan Korpusunun yarandığı gün – 26 iyun Azərbaycan Respublikasının Silahlı Qüvvələr Günü elan olundu və hər il bu tarix rəsmi dövlət bayramı kimi qeyd edilir".

Ramin Şərifov söyləyib ki, Ümummilli Liderin siyasi kursunu uğurla davam etdirən cənab prezident İlham Əliyevin ordu quruculuğu sahəsində atdığı addımlar və uzaqgörən siyasəti nəticəsində 44 günlük Vətən müharibəsindən Azərbaycan öz gücünə ərazi bütövlüyümüzü bərpa edərək dövlətimizin gücünü bütün dünyaya sübut etdi:

"Ali Baş Komandan İlham Əliyevin rəhbərliyi ilə Müzəffər Azərbaycan Ordusu 44 günlük Vətən müharibəsində və bir günlük antiterror tədbirləri nəticəsində ərazi bütövlüyümüzü, suverenliyimizin tam bərpa etdi. Əlbəttə ki, Prezident-xalq-ordu birliyi, həmrəyliyi Böyük Qələbənin qazanılmasında müstəsna rol oynadı. Vətən müharibəsinin rəmzinə çevrilən "Dəmir yumruq" həm gücümüzün, həm də birliyimizin təcəssümüdür.

Bu gün Azərbaycanda mindən çox hərbi təyinatlı məhsul istehsal edilir. Dünyanın aparıcı beynəlxalq sərgilərində Azərbaycanın hərbi məhsulları nümayiş olunur. Prezident İlham Əliyevin təşəbbüsü ilə Azərbaycanda müasir hərbi-sənaye kompleksi də yaradılıb.Bu cür nailiyyətlər Azərbaycana öz ordusunu zəruri silah, sursat və texnika ilə təchiz etmək üçün əvəzsiz imkanlar yaradıb. Bu gün Azərbaycanın Şanlı Ordusu regionun və dünyanın ən güclü orduları sırasında özünə yer alıb. Ölkəmizin son illərdə dinamik inkişafı Silahlı Qüvvələrə ayrılan büdcə vəsaitinin artması və nəticə etibarilə ordumuzun güclənməsi ilə müşayiət olunması Prezident İlham Əliyevin ordu quruculuğu istiqamətində atdığı addımların tərkib hissəsidir".

Telegramda izləyin