Çində bağçada tərbiyəçilər uşaqlara aylarla zəhərli piroqlar veriblər

Çinin Qansu vilayətində yerləşən uşaq bağçasında baş verən kütləvi qurğuşun zəhərlənməsinə görə səkkiz nəfər saxlanılıb.

Sonxeber.az xəbər verir ki, bu barədə məlumatı Çinin "Xinhua" yayıb.

Yayılan məlumatda qeyd edilir ki, uşaqların orqanizminə ağır metal qida vasitəsilə daxil olub. Belə ki, sənaye istifadəsi üçün nəzərdə tutulan, lakin qida sənayesində istifadəsi qəti qadağan olunmuş boyaq maddəsi uşaq menyusunda yer alan məhsullara - xurmalı piroqlara və sosisli xəmir məmulatlarına əlavə olunub.

Xüsusilə narahatedici məqam odur ki, həmin boyaq maddəsinin qablaşdırmasında qida məhsullarında istifadənin qəti qadağan edildiyi aydın şəkildə göstərilib.

Şanxayın "Jibao" qəzetinin məlumatına əsasən, zəhərlənmə nəticəsində 19 uşaq zərər çəkib. Tibbi müayinələr zamanı onların qanında qurğuşunun miqdarı kritik həddən xeyli yüksək olub - bəzi hallarda bu göstərici 400 mikroqram/litri keçib. Halbuki tibbi protokollara görə, 250 mikroqram/litr səviyyəsini keçdikdə artıq xəstəxanaya yerləşdirmə tələb olunur.

Valideynlər bildiriblər ki, son aylarda uşaqlar tez-tez ürəkbulanması, qarın ağrısı, ishal və ayaqlarda zəiflik kimi simptomlardan şikayətləniblər, lakin bu əlamətlərə vaxtında reaksiya verilməyib.

İstintaq çərçivəsində artıq uşaq bağçasının direktoru cinayət məsuliyyətinə cəlb olunub.

Qansu vilayətinin yerli hakimiyyəti isə bölgədəki bütün məktəbəqədər təhsil müəssisələrində sanitar norma və qida təhlükəsizliyi qaydalarının ciddi yoxlanacağını vəd edir.

Telegramda izləyin