"Sülh sazişinin tezliklə imzalanması Azərbaycan və Ermənistanın məsuliyyətindədir, bunun heç kimə aidiyyatı yoxdur' - AÇIQLAMA

Kollektiv Təhlükəsizlik Müqaviləsi Təşkilatı (KTMT) Azərbaycan və Ermənistan arasında sülh sazişinin tezliklə imzalanmasının tərəfdarıdır.

Bu barədə KTMT Kollektiv Təhlükəsizlik Şurasının Bişkekdə keçirilən sammitinin yekunu üzrə qəbul edilmiş bəyannamədə deyilir.

"Azərbaycan Respublikası və Ermənistan Respublikası arasında fəal dövlətlərarası dialoqu məmnunluqla qeyd edirik. Tərəflər arasında hərtərəfli nizamlanmanın və qeyd-şərtsiz sülh sazişinin tezliklə imzalanmasının tərəfdarıyıq", - sənəddə qeyd olunub.

"KTMT-nin bu bəyanatı rəsmi diplomatik dil ilə verilmiş olsa da, məzmun baxımından daha çox "ümumi dəstək" xarakteri daşıyır", - bunu Sonxeber.az -a açıqlama verən politoloq Tural İsmayılov deyib

'Qeyd etmək lazımdır ki, KTMT əslində regionda hərbi və təhlükəsizlik məsələlərinə fokuslanan bir təşkilatdır və Ermənistan-Azərbaycan sülh sazişinin təşviqi onun əsas mandatına daxil deyil. Yəni, bu bəyanatla KTMT həm tərəflərin dialoqunu alqışlayır, həm də özünü neytral və konstruktiv mövqedə göstərir.

Buna baxmayaraq, reallıq budur ki, sülh sazişi yalnız bilavasitə tərəflərin maraqlarına və diplomatik proseslərin dinamizminə bağlıdır. KTMT-nin sülh prosesinə bu cür dəstək verməsi əslində təşkilatın sərhədindən çıxan sahəyə müdaxilə kimi görünə bilər. Ən optimal yanaşma odur ki, KTMT öz hərbi və kollektiv təhlükəsizlik funksiyalarını yerinə yetirsin, regionda təhlükəsizliyi təmin etsin və digər məsələlərə qarışmasın.

Yəni, şərh olaraq deyə bilərik: KTMT bəyanatla "sülh istəyirik" mesajı versə də, işinin əsas istiqamətini – təhlükəsizlik və müdafiə iddia edirsə, ona fokuslansın. Sülh sazişinin tezliklə imzalanması isə Azərbaycan və Ermənistanın məsuliyyətindədir, bunun heç kimə aidiyyatı yoxdur'.

Telegramda izləyin