"Bu gün dünya azərbaycanlıları arxalarında güclü, qalib və söz sahibi olan dövlətin dayandığını aydın şəkildə hiss edir" - AÇIQLAMA

​Dünya azərbaycanlılarının həmrəyliyi gününün dövlət bayramı kimi qeyd edilməsi xalqımızın milli azadlıq mübarizəsinin məntiqi nəticəsi olaraq artıq xoş ənənəyə çevrilmişdir.

Qədim və zəngin tarixə malik olan Azərbaycan xalqının dirçəlişini, tərəqqisini və milli birliyini əks etdirən, onu müstəqil dövlətçilik uğrunda müqəddəs və məsuliyyətli mübarizəyə səfərbər edən həmrəylik günü hər bir azərbaycanlı üçün inam və ümid anıdır. Dünyanın müxtəlif ölkələrində milyonlarla soydaşımız yaşayır, işləyir, fəaliyyət göstərir. Buna baxmayaraq, onların milli-mənəvi varlığını yaşadan yeganə bir dövlət var. Bu, müstəqil, suveren Azərbaycan Respublikasıdır. Dünya azərbaycanlılarının birliyi və həmrəyliyi ideyasının əsasını da məhz Azərbaycan dövlətçiliyinə, xalqımızın dilinə, dininə, milli-mənəvi varlığına və ümumbəşəri dəyərlərə hörmət, onların daim qorunmasına, yaşamasına qayğı təşkil edir."

Bu sözləri Azərbaycan Respublikasının Ümummilli Lideri Heydər Əliyev deyib.

"Dünya Azərbaycanlılarının Həmrəyliyi Günü müasir Azərbaycan siyasi düşüncəsinin və dövlətçilik fəlsəfəsinin mühüm dayaqlarından biridir", - bunu Sonxeber.az -a açıqlama verən politoloq Tural İsmayılov deyib:

"Bu günün ideoloji əsasları Ulu Öndər Heydər Əliyev tərəfindən formalaşdırılmış azərbaycançılıq məfkurəsinə söykənir. Həmrəylik anlayışı burada yalnız emosional birlik deyil, milli maraqların qorunmasına xidmət edən strateji siyasi xətt kimi çıxış edir. Müstəqil Azərbaycan dövləti dünya azərbaycanlıları üçün təkcə tarixi vətən deyil, həm də milli kimliyin, dilin, mədəniyyətin və mənəvi dəyərlərin qoruyucusudur.
Prezident İlham Əliyevin Dünya Azərbaycanlılarının III Qurultayında səsləndirdiyi fikirlər bu xəttin müasir mərhələdə ardıcıl və sistemli şəkildə davam etdirildiyini göstərir. "Bir vətən, bir dil, bir ideologiya" prinsipi diaspor siyasətinin konseptual çərçivəsini müəyyənləşdirir və xaricdə yaşayan soydaşlarımızı vahid siyasi-mənəvi platformada birləşdirir. Qloballaşma şəraitində milli identikliyin zəiflədiyi bir dövrdə Azərbaycan dövləti həmrəyliyi milli təhlükəsizlik və yumşaq güc amili səviyyəsinə yüksəldib.
Bu gün dünya azərbaycanlıları arxalarında güclü, qalib və söz sahibi olan dövlətin dayandığını aydın şəkildə hiss edir. Məhz bu reallıq Dünya Azərbaycanlılarının Həmrəyliyi Gününü sadə anım tarixindən çıxarıb, milli birliyin və siyasi sabitliyin rəmzinə çevirir".

Telegramda izləyin