Dağda qalan kişi 4 gün sonra xilas edildi: "Ulduzlara baxacaqdım, darıxmışdım" - VİDEO

Antalyanın Konyaaltı rayonuna bağlı Çakırlar məhəlləsində, təxminən 800 metr yüksəklikdəki dağın 650-ci metrində dağda qalan 29 yaşlı Samet Kara 4 gün sonra xilas edilib. b.

Sonxeber.az türk mediasına istinadən xəbər verir ki, bazar ertəsi gecəsi dağlıq ərazidən bir şəxsin qışqıraraq kömək istədiyini eşidən yaxınlıqdakı qum ocağında çalışan işçilər ətrafı yoxlayıblar. Təhlükəsizlik əməkdaşları səsin sərt qayalıqların olduğu dağlıq sahədən gəldiyini müəyyən etsələr də, öz imkanları ilə apardıqları axtarış nəticəsiz qalıb. Növbəti gün səhər saatlarında isə yenidən kömək çağırışı eşidildikdən sonra vəziyyət 112 Təcili Çağrı Mərkəzinə bildirilib.

Eyni zamanda ərazidə yaşayan bir vətəndaşın dağlıq sahədə bir nəfəri gördüyü və onun əl yellədiyi barədə verdiyi məlumatdan sonra hadisə yerinə Jandarma Komando Axtarış-Xilasetmə qrupu (JAK) və AFAD əməkdaşları cəlb olunub. AFAD qrupları verilən koordinatlar əsasında termal və infraqırmızı kameralı dronlarla axtarış aparıb.

Axtarış zamanı gəncin yeri müəyyən edilib. Qayalar arasında kiçik bir oyuqda sığındığı və xeyli halsız olduğu müşahidə olunan Samet Kara, onu xilas etməyə gələn AFAD-ın dronuna əl yelləyərək sevincini ifadə edib. Xilas edilən gəncin səhhətinin nəzarət altına alındığı bildirilib.

Kara, dağa çıxma səbəbini soruşduqda isə "Ulduzlara baxacaqdım. Çox darıxmışdım" cavabını verib. Əraziyə hazır vəziyyətdə gələn tibbi heyət tərəfindən yoxlanışdan keçirilən gənc, sonra tədbir məqsədilə xəstəxanaya aparılıb.

Telegramda izləyin