"Gənclərin vətənpərvərlik ruhunda tərbiyəsi məsələsi Prezident İlham Əliyevin çıxışında xüsusi ideoloji xətt kimi önə çıxıb" - DEPUTAT

"Prezident İlham Əliyevin 2025-ci ilin idman yekunlarına həsr olunmuş mərasimdəki çıxışı müasir Azərbaycan dövlətinin idmana yanaşmasının fəlsəfəsini, strateji məqsədlərini və uzunmüddətli baxışını əks etdirən mühüm siyasi sənəd kimi qiymətləndirilə bilər", - bunu Sonxeber.az -a açıqlama verən deputat Şahin Seyidzadə deyib:

"Bu çıxışda idman yalnız yarış və nəticələr kontekstində deyil, milli inkişaf, gənclər siyasəti, beynəlxalq imic və sosial rifah prizmasından təqdim olunmuşdur. Dövlət başçısının qeyd etdiyi kimi, 2025-ci il ərzində Azərbaycan idmançıları beynəlxalq arenalarda misilsiz uğurlar qazanmış, 2000-dən artıq medal əldə etmişlər. Bu göstəricilər ölkəmizin idman tarixində rekord səviyyəyə çatmışdır. Xüsusilə 600-dən çox qızıl medalın qazanılması idman məktəblərinin, federasiyaların və məşqçi heyətinin peşəkarlığını nümayiş etdirir. Prezident İlham Əliyevin vurğuladığı kimi, bu nailiyyətlər təsadüfi deyil, ardıcıl və məqsədyönlü dövlət siyasətinin nəticəsidir. Azərbaycanda idmanın inkişafı dövlət xətti ilə həyata keçirilən proqramlara əsaslanır. Son illər ərzində ölkənin bütün bölgələrində müasir idman infrastrukturu formalaşdırılmışdır. Gəncə və Yevlax Olimpiya İdman Komplekslərinin istifadəyə verilməsi ilə bölgələrdə yaradılan imkanlar daha da genişlənmişdir. Bu, regionlarda yaşayan gənclərin idmana cəlb olunmasına və sağlam həyat tərzinin təşviqinə xidmət edir. Prezident çıxışında sağlam gənc nəslin yetişdirilməsini dövlət siyasətinin əsas məqsədlərindən biri kimi təqdim etmişdir. Sağlam gənclik olmadan nə idman uğurlarını, nə də ümumilikdə cəmiyyətin davamlı inkişafını təmin etmək mümkündür. Uşaqlıqdan idmana marağın artırılması gənclərin həm fiziki, həm də psixoloji inkişafında mühüm rol oynayır. Gənclərin vətənpərvərlik ruhunda tərbiyəsi məsələsi Prezident İlham Əliyevin çıxışında xüsusi ideoloji xətt kimi önə çıxmışdır. Dövlət başçısı qeyd etmişdir ki, gənclər Vətən sevgisi ilə böyüməli, milli maraqları hər şeydən üstün tutmalıdırlar. Bu baxımdan idman gənclərin milli kimliyinin formalaşmasında mühüm vasitədir. İdman meydanlarında əldə edilən qələbələr milli qürur hissini gücləndirir və cəmiyyətdə həmrəylik yaradır. Son beş il ərzində Azərbaycanın Dövlət Bayrağının beynəlxalq arenalarda qürurla dalğalanması, xüsusilə 2020-ci ildə qazanılmış şanlı Zəfərin ideoloji davamı kimi dəyərləndirilir. Prezident İlham Əliyevin qeyd etdiyi kimi, idmançılar artıq müzəffər xalqın nümayəndələri kimi çıxış edirlər və bu status onların məsuliyyətini daha da artırır. MDB ölkələrinin III Oyunlarının Azərbaycanda keçirilməsi ölkəmizin regional və beynəlxalq idman mərkəzi kimi mövqeyini möhkəmləndirmişdir. Yarışların müxtəlif şəhərlərdə təşkil olunması Azərbaycanın infrastruktur potensialını nümayiş etdirmiş, Xankəndidə yarışların keçirilməsi isə xüsusi rəmzi məna daşımışdır. Azərbaycan idmançıları bu Oyunlarda yüksək nəticə göstərərək komanda hesabında ikinci yerə layiq görülmüşdür.

2025-ci ildə Bakıda keçirilmiş UFC beynəlxalq turniri və Formula 1 yarışı Azərbaycanın qlobal idman xəritəsində mövqeyini daha da gücləndirmişdir. Xüsusilə Formula 1 yarışlarından sonra ölkəyə turist axınının 20 faiz artması idmanın iqtisadi və turizm potensialını aydın şəkildə göstərir. Dünya auditoriyasının yarım milyarda çatması bu yarışların informasiya gücünü nümayiş etdirir. Qış idman növlərinin inkişafı çərçivəsində Şahdağ Xizək Kurortunda keçiriləcək Xizək üzrə Dünya Kuboku Azərbaycanın yeni idman mərhələsinə keçidinin göstəricisidir. Bu layihə regionda məşğulluğun artmasına və turizm sektorunun genişlənməsinə ciddi töhfə verir. Prezident İlham Əliyevin vurğuladığı kimi, Bakı şəhərinin "Dünyanın İdman Paytaxtı" seçilməsi Azərbaycanın idman sahəsində gördüyü işlərə verilən beynəlxalq etimadın ifadəsidir. Bu adın ləyaqətlə qorunması və idmançıların dövlət tərəfindən daim dəstəklənməsi Azərbaycan idmanının gələcək uğurlarının əsas təminatıdır".

Telegramda izləyin