Dünyanı təşvişə salan Hantavirus nədir? - ƏLAMƏTLƏRİ

Son günlər bir çox xarici ölkələr Hantavirus infeksiyasına qarşı həyəcan siqnalı çalır. Sonuncu dəfə bu infeksiyaya İspaniyanın Alicante vilayətində yaşayan 32 yaşlı qadında rast gəlinib.

Lent.az xarici mediaya istinadla xəbər verir ki, həmin qadın daha əvvəl bir xəstə ilə eyni anda səyahətə çıxıb. Həmin qadın isə MV Hondius adlı kruiz gəmisində səyahət etdikdən sonra virusa yoluxubmuş.

Hantavirus nədir və necə yayılır?

Hantavirus əsasən gəmiricilər (siçanlar və siçovullar) vasitəsilə yayılan virus qrupudur. İnsanlar adətən virusu yoluxmuş heyvanların sidiyi, nəcis və ya tüpürcəyi ilə çirklənmiş toz hissəciklərini nəfəs yolu ilə qəbul etdikdə yoluxurlar. Daha nadir hallarda birbaşa təmas və ya dişləmə nəticəsində də keçə bilər. İnsanlar arasında ötürülmə çox nadir hallarda qeydə alınır.

Əsas simptomlar

Xəstəlik ilkin mərhələdə qripə bənzər əlamətlərlə başlayır. Bunlara yüksək hərarət, baş ağrısı, əzələ ağrıları, halsızlıq və quru öskürək daxildir. Daha ağır hallarda nəfəs darlığı, ağciyərlərdə maye yığılması və kəskin tənəffüs çatışmazlığı inkişaf edə bilər. Bəzi növlərdə isə böyrəklərə təsir edən formalar da müşahidə olunur.

Sağalma müddəti və müalicə

Hantavirus üçün xüsusi antiviral müalicə hər zaman mövcud deyil, əsasən simptomatik və dəstəkləyici müalicə tətbiq olunur. Yüngül hallarda xəstələr bir neçə həftə ərzində sağala bilər. Lakin ağır hallarda xəstəlik həyati təhlükə yarada bilər və reanimasiya dəstəyi tələb oluna bilər. Erkən diaqnoz və vaxtında tibbi müdaxilə sağ qalma şansını əhəmiyyətli dərəcədə artırır.

Kimlər risk altındadır?

Mütəxəssislər bildirir ki, kənd təsərrüfatı ilə məşğul olanlar, anbar və köhnə tikililərdə işləyənlər, təbiətdə tez-tez vaxt keçirənlər və gəmiricilərlə təmas ehtimalı yüksək olan şəxslər daha çox risk altındadır. Eyni zamanda immun sistemi zəif olan şəxslərdə xəstəliyin daha ağır keçmə ehtimalı var.

Telegramda izləyin