Mütəxəssislər ən faydalı paxlalı bitkini açıqladı

Sağlam qidalanmanın vacib komponentlərindən hesab edilən paxlalı bitkilər arasında lobya və mərcimək xüsusi yer tutur. Mütəxəssislər bildirirlər ki, hər iki məhsul yüksək qida dəyərinə malik olsa da, onların tərkibi və orqanizmə təsiri baxımından müəyyən fərqlər mövcuddur.

Qaynarinfo Unian-a istinadən xəbər verir ki, lhər iki məhsul zülal, lif və mürəkkəb karbohidratlarla zəngindir.

100 qram bişmiş lobyada təxminən 117-119 kalori, 7 qrama qədər zülal və 7 qram lif mövcuddur. Mütəxəssislər qeyd edirlər ki, lobya zülal, dəmir, fol turşusu və antioksidantlarla zəngin olmaqla yanaşı, uzun müddət toxluq hissi yaradır və həzm sisteminin fəaliyyətini dəstəkləyir.

Araşdırmalar göstərir ki, lobyanın müntəzəm istehlakı ürək sağlamlığının qorunmasına, qidalanma keyfiyyətinin yüksəlməsinə və qanda şəkərin səviyyəsinin tənzimlənməsinə müsbət təsir göstərə bilər.

Mərcimək isə zülal və lif baxımından bir qədər üstün hesab olunur. Belə ki, 100 qram məhsulda təxminən 114 kalori, 9 qram zülal və 8 qram lif var. Bundan əlavə, mərciməyin tərkibində dəmir və fol turşusunun miqdarı daha çoxdur.

Mütəxəssislərin sözlərinə görə, mərciməyin qlisemik indeksi aşağı olduğundan o, qanda şəkərin kəskin yüksəlməsinə səbəb olmur və enerji səviyyəsinin daha stabil qalmasına kömək edir.

Qidalanma üzrə ekspertlər bildirirlər ki, hər iki məhsul sağlamlıq üçün faydalıdır və onlardan birini digərindən qəti şəkildə üstün hesab etmək düzgün deyil. Mərcimək daha asan həzm olunduğuna görə həssas mədə-bağırsaq sistemi olan insanlar üçün uyğun sayılır. Lobya isə maqnezium və kalium kimi minerallarla zəngin olduğu üçün ürək-damar sisteminin fəaliyyətinə və enerji mübadiləsinə dəstək verir.

Bununla yanaşı, hər iki məhsul bəzi insanlarda köp və qaz yaranmasına səbəb ola bilər. Mütəxəssislər bu narahatlığın qarşısını almaq üçün paxlalıların əvvəlcədən suda isladılmasını və rasiona tədricən daxil edilməsini tövsiyə edirlər.

Dietoloqların qənaətinə görə, lobya və mərcimək faydalılıq baxımından bir-birinə çox yaxındır. Buna görə də seçim edərkən əsas meyar məhsulun orqanizm tərəfindən necə qəbul edilməsi və gündəlik qidalanmada istifadəsinin rahatlığı olmalıdır.

Telegramda izləyin