Polisdən qaçarkən narkotiki unitaza tökdü, sifon işləmədiyi üçün yaxalandı

Türkiyənin Sakarya vilayətinin Adapazarı rayonunda polisdən yayınmağa çalışan şəxs narkotik maddələri məhv etmək üçün iş yerlərindən birinin tualetinə sığınıb. Lakin sifonun işləməməsi onun planını pozub və şübhəli hadisə yerində yaxalanıb.

Sonxeber.az xarici mediaya istinadla xəbər verir ki, Sakarya İl Təhlükəsizlik İdarəsinin Narkotik Cinayətlərlə Mübarizə Şöbəsinin əməkdaşları narkotik vasitələrin qanunsuz dövriyyəsinin qarşısının alınması istiqamətində apardıqları əməliyyat tədbirləri çərçivəsində 38 yaşlı M.R.C.-nin narkotik satışı həyata keçirəcəyi barədə məlumat əldə ediblər.

Texniki və fiziki müşahidədən sonra əməliyyata başlayan polis əməkdaşlarını görən şübhəli qaçmağa cəhd edib. O, yaxınlıqdakı iş yerlərindən birinin tualetinə girərək üzərindəki narkotik maddələri unitaza töküb. Ancaq sifonun nasaz olması səbəbindən maddələri məhv edə bilməyib.

Şübhəlinin ardınca tualetə daxil olan narkotiklərlə mübarizə əməkdaşları onu unitazın yanında saxlayıblar.

Aparılan araşdırma zamanı 17 qram sintetik kannabinoid, 11,80 qram xüsusi maddə hopdurulmuş salfet və müxtəlif paketlərdə ümumilikdə 4,60 qram metamfetamin aşkar edilərək götürülüb.

Daha sonra şübhəlinin yaşadığı ünvanda keçirilən axtarış zamanı əlavə olaraq 35 qram metamfetamin, bir ədəd qeydiyyatsız tapança və həmin silaha aid 6 patron aşkarlanıb.

Saxlanılan M.R.C. polis bölməsindəki prosedurlar başa çatdıqdan sonra məhkəməyə çıxarılıb. Məhkəmənin qərarı ilə o, "narkotik vasitələrin qanunsuz dövriyyəsi" ittihamı ilə həbs edilərək cəzaçəkmə müəssisəsinə göndərilib.

Telegramda izləyin