Müştərinin limonad istəmə üslubu kafedə qalmaqala səbəb oldu - VİDEO

İstanbulun Avcılar rayonunda yerləşən kafelərdən birində müştəri ilə qadın əməkdaş arasında sifariş zamanı başlayan mübahisə qısa müddətdə böyüyərək qalmaqala çevrilib.

Sonxeber.az xarici mediaya istinadla xəbər verir ki, hadisə gecə saatlarında Avcılar rayonunun Ispartakule məhəlləsində yerləşən kafedə baş verib. İddialara görə, kafeyə gələn müştəri limonad sifariş edib. Sifariş zamanı işlətdiyi ifadə səbəbindən qadın əməkdaşla arasında gərginlik yaranıb.

Görüntülərdə müştərinin "Bir limonad versənə" dediyi, qadın əməkdaşın isə buna "Versənə nə deməkdir?" cavabını verdiyi görünür. Bundan sonra müştəri "Bir limonad verə bilərsiniz?" deyərək sözlərini düzəltməyə çalışıb. Lakin tərəflər arasında dialoq daha da sərtləşib və qarşılıqlı iradlar səsləndirilib.

Mübahisənin böyüməsi nəticəsində müştəri piştaxtanın üzərindəki əşyaları dağıdıb. Ətrafdakı şəxslərin müdaxiləsi sayəsində insident daha da böyümədən nəzarət altına alınıb. Daha sonra şübhəli şəxs kafeni tərk edib.

Kafedə çalışan qadın müştərinin gedərkən onu hədələdiyini iddia edərək polisə müraciət edib. Şikayət əsasında araşdırmaya başlanılıb.

Polis əməkdaşları hadisədən sonra ərazidən uzaqlaşan şübhəlinin müəyyən edilərək saxlanılması istiqamətində əməliyyat-axtarış tədbirləri həyata keçirirlər.

Telegramda izləyin