Ölkənin taleyini dəyişən seçkilər

"1991-ci il oktyabrın 18-də müstəqilliyini elan edən Azərbaycan Respublikasında müstəqilliyin ilk illərində özbaşınalıq hökm sürürdü, orduda vəziyyət ağır idi. Hakimiyyətdə yaranan böşluqdan istifadə edən Erməni separatçıları təcavüzü gücləndirir və bir-birinin ardı ilə əraziləri işğal edirdi. Ölkədə ağır ictimai-siyasi vəziyyət var idi. Belə bir çətin dövrdə gərginləşən siyasi vəziyyət, əhalinin ağırlaşan sosial durumu ölkəni bu bəlalardan xilas edə biləcək, xalqı öz arxasınca aparmağa qadir liderə ehtiyac olduğunu şərtləndirirdi. Xalqın tələbi və o zamanki ölkə rəhbərliyinin xahişi ilə Ulu Öndər Heydər Əliyev Bakıya dəvət olundu. Bu hadisə Azərbaycan xalqının taleyini dəyişdi".

Bu fikirləri Sonxeber.az-a açıqlamasında YAP üzvü Könül Əfəndiyeva bildirib.

"Azərbaycan xalqının taleyində böyük əhəmiyyətə malik günlər var ki, bu günlərdən biri 3 oktyabr 1993-cü il tarixidir. Həmin gün xalqımız özünün gələcək taleyini, müqəddəratını həll edən seçim etdi. 1993-cü il oktyabrın 3-də ölkəmizdə keçirilən prezident seçkilərində Heydər Əliyev xalqımızın böyük əksəriyyətinin etimadını qazanaraq 98.84 faiz səslə Azərbaycan Prezidenti seçildi. Ulu Öndər ölkəni uzun illər davam edən gərginlik və parçalanma təhlükəsindən xilas etdi, qısa müddətdə dünyanın aparıcı dövlətlərinin diqqətini Azərbaycana cəlb etdi. "Əsrin müqaviləsi" kimi tarixləşən neft müqaviləsi imzalandı, ordu quruculuğunda əsaslı islahatlar aparıldı, yerli müdafiə batalyonları buraxıldı, orduda vahid komandanlıq təmin edildi. Ulu Öndərin uğurlu xarici siyasətinin nəticəsiydi ki, Azərbaycan dünya birliyində öz layiqli yerini tutdu.

Həyatının mənasını xalqına və dövlətinə xidmətdə görən Ulu Öndərin müstəqil gənc respublikamıza rəhbərlik etdiyi dövrdə gördüyü əvəzsiz işlər Azərbaycanı çox qısa müddətdə beynəlxalq arenada böyük nüfuza və söz sahibinə malik bir ölkəyə çevirdi.Ölkəmizdə demokratik, hüquqi və dünyəvi dövlət quruldu.

"Bizim məqsədimiz Azərbaycanı bir müstəqil dövlət kimi yaşatmaq, inkişaf etdirmək, dünya dövlətləri içərisində güclü, iqtisadi cəhətdən inkişaf etmiş bir dövlətə çevirməkdir. Bizim məqsədimiz Azərbaycanı tam demokratik dövlət etməkdən, demokratiya yolu ilə irəlilətməkdən və ölkəmizdə hər bir vətəndaşın hüquqlarını qorumaqdan, azadlığını təmin etməkdən ibarətdir." -Ulu Öndərin söylədiyi bu fikirlər bu gün bir reallıqdır. Bu gün 30 ildən sonra ərazi bütövlüyünü, suverenliyini bərpa edən dövlətimizin müstəqilliyi dönməz və əbədidir".

Röyalə Xəyal

Telegramda izləyin