Bakıda ilk dəfə FIFA U-15 Dünya Çempionatı və Festivalı keçirilir

Tarixdə ilk dəfə təşkil olunan FIFA U-15 Dünya Çempionatı və Festivalına Bakı ev sahibliyi edir. Dünyanın 189 ölkəsindən FIFA-ya üzv assosiasiyaları təmsil edən 4 minə yaxın gənc futbolçu, məşqçi və rəsmi turnirdə iştirak edir.

BiG.AZ xəbər verir ki, yarışın Azərbaycanda keçirilməsi ölkədə idmanın inkişafı, müasir idman infrastrukturunun yaradılması və beynəlxalq əməkdaşlığın genişləndirilməsi istiqamətində görülən işlərin nəticəsi kimi qiymətləndirilir. Prezident İlham Əliyevin rəhbərliyi ilə həyata keçirilən dövlət idman siyasəti və bu sahədə aparılan ardıcıl islahatlar ölkənin beynəlxalq idman tədbirlərinə ev sahibliyi imkanlarını genişləndirib.

Azərbaycanın müasir idman infrastrukturu, sabitliyi, təhlükəsizliyi və əvvəlki illərdə qazandığı təşkilatçılıq təcrübəsi belə irimiqyaslı tədbirlərin yüksək səviyyədə keçirilməsinə şərait yaradır. Bu baxımdan, ölkəmizin FIFA U-15 Dünya Çempionatı və Festivalına ev sahibi seçilməsi beynəlxalq idman ictimaiyyətinin Azərbaycana olan etimadının göstəricisi kimi çıxış edir.

Turnir, eyni zamanda, Azərbaycanın beynəlxalq futbol ictimaiyyəti ilə əlaqələrinin genişləndirilməsi, uşaq və yeniyetmə futbolunun inkişafı, eləcə də gənc nəslin idmana marağının artırılması baxımından xüsusi əhəmiyyət daşıyır.

Qeyd edək ki, yarışın açılış oyunu və final qarşılaşması Bakı Kristal Zalında keçiriləcək.
Aynur Babazadə

Telegramda izləyin