ABŞ Konqresində Pentaqon rəhbəri Pit Heqsetin impiçment cəhdinin qarşısı alınıb

ABŞ Konqresinin Nümayəndələr Palatasında respublikaçılar müdafiə naziri Pit Heqsetin impiçmentinə dair təşəbbüsün qarşısını alıblar.
Bizimyol.info xəbər verir ki, respublikaçı konqresmen Tomas Massi Heqseti İran müharibəsi zamanı Konstitusiyanı pozmaqda, mülki şəxslərin ölümünə səbəb olan əməliyyatlarda, eləcə də Konqresin icazəsi olmadan Venesuela və Yəməndə hərbi əməliyyatlar aparmaqda ittiham edib.

Respublikaçılar impiçment təşəbbüsünü Nümayəndələr Palatasının Hüquq Komitəsinə göndərmək təklifi ilə çıxış ediblər. Səsvermədə bu qərar 211 lehinə, 204 əleyhinə səslə qəbul olunub. Tomas Massi qərarın əleyhinə səs verən yeganə respublikaçı olub.

ABŞ Prezidenti Donald Tramp səsvermənin nəticəsini alqışlayaraq Heqsetin "böyük Amerika vətənpərvəri" olduğunu bildirib. Pentaqon isə qərarı müdafiə naziri üçün "tam qələbə" adlandırıb.

Heqset impiçment təşəbbüsünü "siyasi tamaşa" və "məzhəkə" kimi qiymətləndirərək rədd edib.

Bununla belə, demokratların noyabrda keçirilən aralıq seçkilərdə qazandığı üstünlük impiçment məsələsinin gələcəkdə yenidən gündəmə gəlməsi ehtimalını artırır. Nümayəndələr Palatasının demokrat lideri Hakim Cefris Heqsetin milli təhlükəsizliyə zərər vurduğunu bildirərək onun impiçmentini dəstəklədiyini açıqlayıb.

İmpiçment təşəbbüsü qəbul edilsəydi, onun qüvvəyə minməsi üçün respublikaçıların nəzarətində olan Senatın da təsdiqi tələb olunacaqdı.

Telegramda izləyin