İşə qəbulda 30 yaş məhdudiyyəti, pensiyada 65 yaş - Vətəndaş 35 il necə dolanmalıdır? - İQTİSADÇIDAN AÇIQLAMA

Azərbaycanda əmək bazarında işə qəbul zamanı yaş amili yenidən müzakirə mövzusuna çevrilir. İstər dövlət, istərsə də özəl sektorda bir çox vakansiyalarda 18-30 yaş aralığında namizədlərə üstünlük verilməsi daha yaşlı işaxtaranların məşğulluq imkanlarını məhdudlaşdırır. Halbuki ölkədə pensiya yaşı 65 müəyyən edilib.

Bu isə əmək qabiliyyətli insanların uzun illər iş tapmaqda çətinlik çəkməsi və pensiya yaşına qədər dolanışığını necə təmin etməsi məsələsini gündəmə gətirir. Nəticədə ortaya ciddi sual çıxır: İşəgötürənlər yaş məhdudiyyəti tətbiq edirsə, 30 yaşdan sonra vətəndaşın əmək bazarında yeri necə müəyyənləşməlidir?
Mövzu ilə bağlı Liberal İqtisadçılar Mərkəzinin sədri Akif Nəsirli Sonxeber.az-a açıqlamasında bildirdi ki, burada əsas problem əmək bazarında yaş ayrı-seçkiliyinin mövcudluğudur. Təəssüf ki, həm dövlət, həm də özəl sektorda bir çox işəgötürənlər daha çox 18-30 yaş aralığında olan şəxslərə üstünlük verirlər. Halbuki insanın əmək qabiliyyəti 30 və ya 40 yaşında başa çatmır. 50-55 yaşlı insanlar arasında kifayət qədər təcrübəli, savadlı və işləmək qabiliyyətinə malik mütəxəssislər var. Onların əmək bazarından kənarda qalması həm həmin insanların sosial vəziyyətinə, həm də ölkənin iqtisadi potensialına mənfi təsir göstərir.

Digər tərəfdən, vətəndaşdan 65 yaşına qədər pensiya yaşına çatmadan əmək fəaliyyəti göstərməsi gözlənilirsə, onun bütün bu müddət ərzində işləmək imkanları da təmin edilməlidir. İnsan 35 il ərzində hansı mənbədən dolanmalıdır? İşəgötürənlər yaşlı işçiləri işə qəbul etmək istəmirsə, bu, ciddi sosial və iqtisadi problemdir. Pensiya sisteminin dayanıqlılığı yalnız pensiya yaşının müəyyən edilməsi ilə təmin olunmur. Bunun üçün orta və yuxarı yaş qruplarından olan insanların da əmək bazarında iştirakına şərait yaradılmalıdır. Əsas meyar insanın yaşı deyil, peşəkarlığı, təcrübəsi və işləmək qabiliyyəti olmalıdır.

Müəllif: İlkin Məmmədkərimov

Telegramda izləyin