Gecə səs-küy salan qonşuları hansı cəza gözləyir? - AÇIQLAMA

Gecə saatlarında yaşayış binalarında yüksək səslə musiqi dinlənilməsi, təmir işlərinin aparılması və digər səs-küy yaradan hallar sakinlər arasında narazılığa səbəb olur. İnzibati Xətalar Məcəlləsinin 521-ci maddəsi gecə vaxtı dincliyin pozulmasına görə məsuliyyət nəzərdə tutur. Lakin bu normanın tətbiqində səs-küyün necə qeydə alınması, şikayətin hansı quruma ünvanlanması və pozuntunun hansı sübutlarla təsdiqlənməsi mühüm əhəmiyyət daşıyır.

Bəs, gecə saatlarında səs-küydən narahat olan sakinlər hara müraciət etməli və şikayətlərini necə rəsmiləşdirməlidirlər? Polis belə hallarda pozuntunu hansı qaydada qeydə alır və cərimə tətbiq etmək üçün hansı sübutlar əsas götürülür?
Mövzu ilə bağlı Sonxeber.az-a açıqlama verən vəkil Cavanşir Qasımzadə bildirib ki, səs-küyə səbəb olan hüquqpozmalarla qarşılaşdıqda yaşadıqları ərazi üzrə polis idarəsinə və ya ən yaxın polis bölməsinə müraciət edə bilərlər.

"Eyni zamanda, 102 xidmətinə zəng edərək şikayətlərini bildirə bilərlər. 102 xidmətinə edilən müraciət müvafiq polis idarəsinə, oradan isə aidiyyəti polis bölməsinə yönləndirilir. Bundan sonra polis əməkdaşları hadisə yerinə gəlir və ya ərazi üzrə sahə inspektoruna məlumat verilir. Hadisə ilə bağlı müvafiq akt tərtib olunur, qanunvericiliyə uyğun cərimə tətbiq edilir və hüquqpozmanı törədən şəxsin üzərinə həmin hərəkəti dayandırmaq öhdəliyi qoyulur.

Sübut məsələsinə gəldikdə, müvafiq polis orqanının əməkdaşları tərəfindən tərtib edilən akt mühüm əhəmiyyət daşıyır. Bununla yanaşı, polis əməkdaşları hadisə yerinə gələnədək səs-küyü əks etdirən audio və ya video görüntülərin qeydə alınması da sübut baxımından əhəmiyyətli rol oynaya bilər".

Röyalə Xəyal

Telegramda izləyin