"İslamda yoxdur" deyən ilahiyyatçı Elşad Miri üçün doğru olan nədir? - AÇIQLAMA

Saytların birinə açıqlamasında ilahiyyatçı Elşad Miri belə bir sözlər işlədib: "Bugünkü yas mərasimlərinin təşkil olunmasında məqsəd insanların orada dini maarifləndirilməsi, mütərəqqi fikirlər aşılanması deyil. Bunların hamısı müəyyən biznes məqsədlərinə xidmət edir. Yas çadırlarının yığışdırılması mənim çoxdandır gözlədiyim məsələ idi". Bəs onun üçün dində doğru olan nələrdir?

Sonxeber.az bu sualın cavabını almaq üçün ilahiyyatçı Elşad Miri nin özünə müraciət edib.

O, sözlərini bir daha təsdiqləyərək bildirib ki, İslamda ümumiyyətlə "yas mərasimi" yoxdur:

"Sual mollalıqla bağlı idi. Mən də dedim ki, İslamda heç bu yoxdur. Elə deməyimin səbibini də açıqlayım. Peyğəmbərin özünün sağlığında üç oğlu və üç qızı vəfat edib. Hansı birinə mollalıq edib, yas məclisi qurub, halva verib, orada insanlara "Quran" oxuyaraq ruhuna göndərib?! Heç bir yerdə bu barədə məlumat yoxdur.

Biz belə şeyləri başqa haradan çıxara bilərik? "Quran"da bununla bağlı nəsə varmı? Xeyir! Tam əksinə, "Quran"ın ölülər üçün yox, dirilər üçün olduğu bildirilir.

Bu gün yas məclisinə gedəndə insanlar dinlə bağlı nəsə öyrənirlərmi? Demək olar ki, sadəcə ərəbcə oxunan nəyəsə qulaq asırlar, öz aralarında söhbət edir, süfrəyə gələn çayı içib, yeməyi yeyib, vəfat edən adamın yaxınlarına başsağlığı verirlər və dağılışırlar. Vəssalam! Missiya bundan ibarətdir".

İlahiyyatçı onun üçün yalnız "Quran"da deyilənlərin doğru olduğunu bildirib:

""Quran"da olan hər bir şey doğrudur. Çünki İslamın, dinin yeganə mənbəyi "Quran"dır. Əksini iddia eləmək "Quran"ı təkzib etməkdir".

"Quran"da yazılan hər şeyə əməl edib-etmədiyi barədə suala cavab olaraq isə o, "Bəli! "Quran"da yazılan hər bir şeyə əməl etməyə çalışıram" sözlərini deyib.
ZAİRA AKİFQIZI

Telegramda izləyin