"Ulu Öndər Heydər Əliyev tərəfindən qoyulan siyasət İlham Əliyev tərəfindən uğurla davam etdirilir" - Cavanşir Paşazadə

"Ulu Öndər Heydər Əliyev öz siyasi dühası ilə Azərbaycanın müasir simasını müəyyənləşdirərək xalqımızın taleyində silinməz izlər qoyub".

Bu sözləri Sonxeber.az-a danışan deputat Cavanşir Paşazadə deyib.

Deputat qeyd edib ki, Ümumilli lider Heydər Əliyev müstəqil Azərbaycan dövlətinin qorunub saxlanması, milli dövlət quruculuğu, ölkəmizin inkişafı yolunda böyük işlər görüb, bu yolda misilsiz xidmətlər göstərib:

"O, 1969-1982 və 1993-2003-cü illərdə Azərbaycana rəhbərlik edib. Ulu Öndər Heydər Əliyevin hakimiyyəti dövründə müasir Azərbaycan iqtisadiyyatının əsasları qoyulub. 1993-cü ildə isə xalqın təkidli tələbi ilə hakimiyyətə qayıdan Heydər Əliyev müstəqilliyimizi təhlükədən xilas edərək, müasir Azərbaycan dövlətinin banisinə çevrilib. Həmin seçimlə bugünkü qüdrətli Azərbaycan dövlətinin təməli qoyulub.

Təbii ki, xalqımızın Ulu Öndər Heydər Əliyevə olan inamı heç də səbəbsiz deyil. Heç kəsə sirr deyil ki, Qanlı Yanvar faciəsinə, Azərbaycan xalqına qarşı törədilən cinayətə ilk etiraz səsini ucaldan məhz Ulu Öndər Heydər Əliyev oldu. Belə ki, hadisənin ertəsi günü Moskvada Azərbaycanın daimi nümayəndəliyinə gələn xalqımızın dahi oğlu bu vəhşiliyi qətiyyətlə pisləməklə yanaşı, onun törədilməsi səbəblərini də açıqladı, təşkilatçılarının, günahkarlarının adını bütün dünyaya bəyan etdi. Məhz ona görə də xalqımız çox yaxşı başa düşürdü ki, ölkəni bu ağır vəziyyətdən yalnız Heydər Əliyev kimi cəsarətli və uzaqgörən bir rəhbər çıxara bilər. Bu səbəbdən də 1993-cü ildə xalqın təkidli tələbi ilə hakimiyyətə qayıdan Heydər Əliyev müstəqilliyimizi təhlükədən xilas edərək, müasir Azərbaycan dövlətinin banisinə çevrildi. Həmin dövrdə Ulu Öndər xalqın səsinə səs verdi və bu çətin və məsuliyyətli vəzifəni üzərinə götürdü. Beləliklə, 1993-cü ilin iyun ayında xalqın istəyi və tələbi ilə Heydər Əliyevin yenidən hakimiyyətə gəlişi müstəqil Azərbaycan tarixində dönüş nöqtəsi, yeni bir mərhələ oldu. O, hakimiyyətdə olarkən dövlətimizi zamanın ən ağır sınaqlarından çıxararaq ölkənin gələcək inkişaf strategiyasını müəyyən etdi. Ən önəmlisi isə budur ki, qısa müddət ərzində bir çox ölkələrlə qarşılıqlı səmərəli əməkdaşlıq quruldu və ümumiyyətlə, bütün sahələrdə inkişafın əsası qoyuldu".

Deputat vurğulayıb ki, əsası Ulu Öndər Heydər Əliyev tərəfindən qoyulan siyasət cənab Prezident İlham Əliyev tərəfindən uğurla davam etdirilir:

"Bu gün Ümummilli lider Heydər Əliyevin layiqli davamçısı olan Ali Baş Komandan İlham Əliyevin rəhbərliyi ilə Müzəffər Azərbaycan Ordusu 44 günlük Vətən müharibəsində əldə etdiyi möhtəşəm qələbə ilə ərazi bütövlüyümüzü bərpa edərək dövlətimizin gücünü bütün dünyaya nümayiş etdirdi. Ən önəmlisi isə, 300 ildə ilk dəfə idi ki, işğal altında olan torpaqlarımızı Müzəffər Ali Baş Komandan İlham Əliyevin rəhbərliyi ilə geri qaytardıq. Bu qələbə ilə Ulu Öndər Heydər Əliyevin layiqli davamçısı olan cənab Prezident İlham Əliyev atasının arzusunu reallaşdıraraq xalqımızı 30 il həsrətində olduğu torpaqlara qovuşduraraq, adını tarixinə qızıl hərflərlə yazdırdı".

Aysel Yusifqızı

Telegramda izləyin