"TikTok"da narkotik satışı, gənclərin alçaldılması... - ÇARƏ NƏDİR?

Son zamanlar sosial şəbəkələrdə, əsasən də "TikTok" səhifələrində yeniyetmə və gənclərin kimisə alçaldıb videoya çəkməsinin və narkotik maddələrin təbliğatının şahidi oluruq. Bəs bunun qarşısını necə almaq olar?

Məsələ ilə bağlı Sonxeber.az-a ilahiyyatçı, Elm və təhsil komitəsinin üzvü, deputat Ceyhun Məmmədov açıqlama verib.

O, mövzuya dəfələrlə toxunulduğunu və görüntülər yayıldıqda dərhal tədbir görüldüyünü qeyd edib:

"Əslində sosial şəbəkələr dəyərlərimizi təbliğ etməyə, maarifləndirmə aparmağa yaxşı bir imkandır. İnsanların da əsas istiqaməti bu olmalıdır. Amma təssüf ki, bəzən gənclərin yalnış addım atdıqlarını görürük. Bu, birmənalı olaraq yaxşı hal deyil.

Hesab edirəm ki, belə hadisələr olan zaman bununla bağlı aidiyyəti orqanlar lazımi addımlar atırlar və kimsə belə halla rastlaşarsa, mütləq məlumat verməlidir ki, müvafiq dövlət qurumları tədbir görsünlər.

Sosial şəbəkələrdən həm müsbət, həm də mənfi yöndə istifadə etmək olur. Lakin təəssüf ki, təkcə "TikTok" yox, bir sıra hallarda digər sosial şəbəkələrdən də müxtəlif, xoşa gəlməyən məqsədlərlə istifadə olunduğunun şahidi oluruq. Son günlərdə sosial şəbəkələr vasitəsilə hətta narkotik satışı da həyata keçirilir. Bu isə yolverilməzdir!

Düşünürəm ki, burada bizim iki yolumuz var:

1. İnzibati qaydada sosial şəbəkələrin fəaliyyətinin dayandırılması. Bu, beynəlxalq müstəvidə qəbul edilmir. İnsan hüquqlarının məhdudlaşdırılması kimi qəbul olunur.

2. İnsanlar özləri anlasınlar ki, bu, kütləvi, ictimai bir yerdir. Burada hər bir insan öz davranışına, əməlinə ciddi nəzarət etməlidir. Belə hallar isə yolverilməzdir.

Biz öz dəyərlərimizi qorumalıyıq, insanlara mənəvi dəyərləri təbliğ etməliyik".

ZAİRA AKİFQIZI

Telegramda izləyin