"Bu qərar kitab və digər çap məhsullarının, dərsliklərin qiymətinin aşağı düşməsinə səbəb olacaq" - Deputat

İdxalı və satışı əlavə dəyər vergisindən azad edilən kütləvi informasiya vasitələri məhsullarının və kitabların (elektron kitablar istisna olmaqla), habelə dərslik komplektlərinin və həmin malların (məhsulların) istehsalı (nəşri) ilə bağlı rulon və ya vərəqə şəklində kağızın siyahısı təsdiq edilib. Bununla bağlı Baş nazir Əli Əsədov qərar imzalayıb.

Mövzu ilə əlaqədar Sonxeber.az-a danışan deputat Müşfiq Cəfərov bildirib ki, media çap məhsullarının ƏDV-dən azad edilməsi ilə bağlı qərara əsasən, ötən il dekabr ayının 3-də Azərbaycan Respublikasının Vergi Məcəlləsinə dəyişiklik edilmişdi:

"Prezident İlham Əliyevin Fərmanı ilə Azərbaycanda kütləvi informasiya məhsullarının, kitabların və dərsliklərin, həmçinin həmin məhsulların istehsalı və nəşri ilə bağlı kağızın idxalı və satışının əlavə dəyər vergisindən azad olunması ilə əlaqədar müvafiq dəyişikliyin siyahısının təsdiq olunması Nazirlər Kabinetinə həvalə olunub.

Mayın 13-də isə Baş nazir bununla bağlı müvafiq qərar imzaladı. Bu qərar çap mediası məhsullarının maya dəyərinin və onların istehsal xərclərinin ciddi şəkildə azalmasına, nəticə etibarilə isə bu sahənin inkişafına təkan verəcək. Bundan sonra kitab, jurnal və qəzet üçün lazım olan kağızın 18 faiz əlavə dəyər vergisindən azad edilməsi müəyyən müddət ərzində hökm sürən durğunluğun aradan qalxmasına gətirib çıxaracaq. Təssüf ki, hazırda, müasir tələblərə uyğun olaraq, çap mediasina maraq az idi. Düşünürəm ki, bu qərar çox yerində və düzgün oldu.

Bu sahədə ƏDV-nin ləğv edilməsi kitab və digər çap məhsullarının, dərsliklərin qiymətinin aşağı düşməsinə səbəb olacaq, ölkədə çap sənayesinin inkişafını təşviq edərək hətta yeni iş yerlərinin və sahibkarlığın inkişafına təkan verəcək.

Qeyd edim ki, bu qanun layihəsi davamlı olacaq və mərhələ ilə bir çox sahəni əhatə edəcək".

Aysel Yusifqızı

Telegramda izləyin

instagramda izləyin