"Sənət insanlarının öz büdcələri, şəxsi mənfəətləri üçün efirdə pul yığmaları düzgün deyil"

Son zamanlar televiziyada yayımlanan yardım kampaniyaları gündəmdə müzakirə olunan mövzular sırasındadır.

Azərbaycan xalqının xeyirxah və mərhəmətli olması nəticəsində bu yardım kampaniyaları faydalı olur. Belə layihələr sayəsində bir çox xəstə uşaqlar şəfa tapır, qazilər müalicə alır. Bunlar təqdirəlayiqdir. Kampaniyaların genişlənməsi nəticəsində televiziyalara olan müraciət sayı daha da artırır. Lakin vəziyyət o həddə çatıb ki, bəzi sənət adamları bundan sui-istifadə etməyə çalışırlar. Efirdə ekspertlə sənət insanlarının sözü bir-birinin boğazından keçmir və izləyicilər qalmaqallı anlara tamaşa edirlər.

Bəs bütün bunların baş verməsi nə dərəcədə düzgündür?

Mövzu ilə bağlı Sonxeber.az saytına teletənqidçi, filologiya elmləri doktoru, BDU-nun professoru, əməkdar jurnalist Qulu Məhərrəmli açıqlama verib.

O bildirib ki, efirlərdə kimin hansı məqsədlə pul toplaması araşdırılıb dəqiq bilinməlidir:

"Televiziyada bu tip verilişlərin artması müraciətlərin artmasına gətirib çıxarır. İctimai əhəmiyyət kəsb edən kampaniyaların olmasına, "YAŞAT" Fondu daxil olmaqla, cəmiyyət kömək edir. Digər məsələlərdə isə format və məqsəd ciddi düşünülməlidir və televiziyanın aydın baxışı olmalıdır. Televiziyalar bu məsələyə qarşı həssas və diqqqətli olmalıdır. Hər şey ücün televiziyaya çıxıb pul istəmək yanlış yanaşmadır".

Teletənqidçi sənət insanlarının efirə çıxmasına da fikir bildirərək qeyd edib ki, bir zamanlar camaat müğənnilərdən pul istəyirdi, amma indi situasiya dəyişib:

"Sənət insanlarının da nəyəsə ehtiyacı ola bilər. Bu təbiidir, amma o ehtiyacın ictimai yönü var ya yox? Buna diqqət olunmalıdır.

Sənət insanlarının öz büdcələri, şəxsi mənfəətləri üçün efirdə pul yığmaları düzgün deyil, amma ictimai bir layihə, yaradıcılıq üçün müraciət edirsə, bu, təbii haldır".

AYSEL QULİYEVA

Telegramda izləyin