"Peşə xarakteri dəyişir, xarakter peşəni dəyişə bilmir" - Psixoloq

İnsan peşə seçimi edərkən hansı özünün psixoloji xüsusiyyətlərini nəzərə almalıdır?

Mövzuyla bağlı Sonxeber.az psixoloq Gülər Məmmədovanın fikirlərini öyrənib.

O bildirib ki, hər bir insan peşə seçərkən peşəsinin psixiofiziologiyasına uyğun davranış sərgiləməlidir:

"Təəssüf olsun ki, peşə seçiminə qeyd etdiyim bu fikirlə yanaşan çox az insanlar var. Ümumiyyətlə, bəzən insan görə biləcəyi işin dalınca deyil, günün tələb etdiyi və ya ondan tələb olunan işin arxasınca gedir. Sözün əsl mənasında onun hansı peşəyə layiq olduğunu, əqli və fizioloji cəhətdən o işə uyğunluğunu nəzərə alanlar az olur.

Hər sənətin özünə uyğun psixofizioloji xüsusiyyətləri var. Yaxşı olardı ki, insan həqiqətən tutduğu vəzifənin məsuliyyətini, çətinliyini dərk etsin. Hər bir insan psixoloji testdən keçsə və buna uyğun özünə peşə seçsə, o zaman onun işi daha uğurlu alınacaq. Məsələn, insan valideynlərin istəyi ilə, dövrün tələbinə uyğun seçim edirsə və xarakteri bu peşədə fəaliyyət göstərməyə imkan vermirsə, onu yarımçıq qoyacaq. Çünki onun həmin peşəyə uyğun olmadığı kənardan seziləcək. Peşə xarakteri dəyişir, amma xarakter peşəni dəyişə bilmir. Hər kəs, tutduğu vəzifədən asılı olaraq, peşənin içinə daxil olan bütün modeli düzgün mənimsəməli və ona uyğun həyat yolunda irəliləməlidir. Əks halda, insanlar peşələrini davam etdirmirlər. Yaxşı olardı ki, özlərini daxildən tanıyıb sevsinlər və seçdikləri peşəyə uyğun davransınlar".

Şəbnəm Lətifi

Telegramda izləyin