"Formula-1" yarışı evlərin bahalaşmasına necə təsir edir? - Ekspertdən AÇIQLAMA

""Formula-1" yarışları başlayan ərəfədə həmin ərazilərdə olan evlərə tələbat olduqca yüksəlir. Yarışa baxmaq üçün əcnəbi vətəndaşların da sayı kifayət qədərdir".

Bu sözləri Sonxeber.az saytına daşınmaz əmlak üzrə ekspert Elnur Azadov deyib.

O, qeyd edib ki, vətəndaşların bəziləri oteldə, bəziləri isə gündəlik evlərdə yerləşirlər:

"Gündəlik evləri kirayə verənlərin sayının artmasından əlavə, bundan sui-istifadə edənlər də var. Süni artımlara isə hazırda nəzarət yoxdur, çünki bu daşınmaz əmlak hüquqi şəxslərə yox, vətəndaşlara aiddir və onların mülkiyyətində olan əmlaka hər hansı qiymətin qoyulması qanunla nəzərdə tutulmayıb.

"Formula" yarışlarından sonra bu mənzillərin öz əvvəlki qiymətinə qayıtması gözlənilir. Pandemiya dövründə turistlərin sayı azaldı, otellər və gündəlik mənzillərin qiyməti aşağı düşdü. Adətən gündəlik mənzillər otellərdən daha ucuz qiymətə başa çıxırdı. Amma nəzərə almaq lazımdır ki, otellərdə olan xidmət həmin evlərdə yoxdur.

Həmin şəxslər gözlənilən gəlirləri itirdikləri üçün indi qiymətlərin belə olması təəccüblü deyil.

Son 2 ildə ilkin bazarda tikinti şirkətləri tərəfindən satılan mənzillərin qiymətləri 20% qalxıb. Buna isə səbəb inşaat materiallarının kəskin bahalaşmasıdır. İnşaat materiallarının bahalaşması isə evlərin qiymətinin artımına gətirib çıxarır".

AYSEL QULİYEVA

Telegramda izləyin