Deputatlar yay tətilini harada keçirəcəklər?- SORĞU

İyul ayının 15-də Milli Məclisin məzuniyyətə çıxacağı gözlənilir.

Sonxeber.az azərbaycanlı deputatlar arasında yay tətilini harada keçirəcəkləri ilə bağlı sorğu keçirib.

Həmin sorğunu sizə təqdim edirik:

Deputat Zahid Oruc bildirib ki, bir neçə günlük ölkə ərazisində yer seçəcək:

"Doğrusu, hələ tətilə çıxmamışıq. Açığı, Avropada parlament üzvlərinin, dövlət adamlarının reqlamentləşdirilmiş həyatını görəndə insan onlara çox fərqli hisslərlə yanaşır. Saat 6 tamam olan kimi onlarda həkim belə xəstəni qəbul etmədən çıxıb gedir, dövlət adamlarını da müəyyən zamanlarda işdə görmürük.

Bizim həyatımız isə bir qədər fərqli olur. Səmimi deyim ki, əlahiddə bir formada qış dövrünü Alp dağları çevrəsində, yayı isə çox fərqli məkanda keçirim deyə bir plan qurmamışam. Yaxın çevrəm və ailə üzvlərim bunu bir həyat faktı kimi qəbul ediblər. Əlbəttə, biz istər Milli Məclis, istərsə də təmsil etdiyim Sosial Tədqiqatlar Mərkəzi çərçivəsində çox sərt tələblər altında işləmişik. Bunların hər birini mediaya açıqlamaq mümkün deyil. Çünki dövlət işinin mühüm bir hissəsi məxfilik tələb edir.

Bu əsnada, təmsil etdiyimiz mərkəz yeni bir iş şəraitinə köçüb. Yaxşı anlayırıq ki, tələblər də artıb. Əmək qanunvericiliyinin bir aylıq məzuniyyətI dövründə haradasa dincəlmək fikrimiz yoxdur. Bir neçə gün və ya bir neçə həftə ölkə daxilində keçirəcəyik. Bu hamı tərəfindən qəbul olunub ki, yaxşı istirahət yaxşı işləmək üçün əsasdır. İnsan fiziologiyasının müəyyən bir limiti var. Təbii ki ölkə daxilində uyğun bir yer seçəcəyəm. Ola bilər ki, bu, ölkə daxilində bağ ərazisi olsun".

Deputat Ceyhun Məmmədov bildirib ki, Azərbaycanda sanatoriyada istirahət etməyi planlayır:

"Parlamentdə iclaslar bitsə də, media ilə görüşlər davam edir. Planım 15 gün Azərbaycanın hansısa bölgəsində sanatoriyada istirahət etmək, sonra da yarıda qalan işləri həll etmək, bəzi məqalələr və kitabları yekunlaşdırmaqdır".

Deputat Elman Nəsirov bildirib ki, Azərbaycanın istirahət mərkəzlərində azı 10 gün dincəlmək istəyir:

"Yəqin ki, iyul ayının 15-də tətilə çıxacağıq. Yaz sessiyası başa çatdı. İndi növbədənkənar iclaslar keçririlir. Vaxt yaxınlaşdıqca bu barədə düşünəcəyəm. Amma Azərbaycanın istirahət mərkəzlərində azı 10 gün dincəlmək istəyirəm".

Deputat Jalə Əliyeva bildirib ki, tətili bağda keçirəcək:

"Bakıda şəxsi evimdə və ya bağda keçirəcəyəm. Yəqin ki, bir müddətlik rayona gedib-gələcəyəm və hərdənbir bağ tətili edəcəyəm".

Deputat Cavid Osmanov bildirib ki, məzuniyyətinin böyük hissəsini seçildiyi Ağdaş rayonunda keçirəcək:

"Bildiyiniz kimi, millət vəkilləri gələn ayın 15-dən məzuniyyətdə olacaqlar. Məzuniyyət müddətini əsasən ölkə daxilində keçirəcəyəm, böyük bir hissəsini seçildiyim Ağdaş rayonunda olacağam. Eyni zamanda, seçicilərlə görüşlər planlaşdırıram və şəhid ailələrini, qazilərimizi ziyarət edəcəyəm. Vaxt olduqca ölkəmizin digər rayonlarına da baş çəkmək planımda var".

Deputat Arzu Nağıyev bildirib ki, hələ bununla bağlı hər hansı bir planı yoxdur:

"Yay tətilinə çox var. Hələ heç bir planım yoxdur. Bu ay da sessiyalar davam etdiyinə görə hələ dəqiq planlaşdırmamışam".

Deputat Bəhruz Məhərrəmov bildirib ki, işlər çox olduğundan tətilə çıxmağı planlaşdırmır:

"Bizdə tətil, demək olar ki, olmayacaq. Çünki işlər çoxdur, seçicilərlə tətil olmur. Hələ ki, tətil planlaşdırmıram".

Şəbnəm Lətifi

Telegramda izləyin