"Formula-1" ilə bağlı əhaliyə MÜRACİƏT - RƏSMİ

Bakıda "Formula-1"ə hazırlıqlar başlayıb.

Bununla bağlı şəhərin bəzi mərkəzi küçələrində avtomobillərin hərəkətinə məhdudiyyətlər qoyulub, bəzi küçələrdə isə hərəkət istiqamətində dəyişikliklər edilib.

Sonxeber.az olaraq məsələ ilə bağlı Bakı Şəhər Baş Dövlət Yol Polisi İdarəsinin ictimaiyyətlə əlaqələr şöbəsinin rəisi, polkovnik Vaqif Əsədovla əlaqə saxladıq.

O, hansı yolların bağlanması ilə bağlı məlumat verərək, əhaliyə müraicət edib:

"Bilirsiniz ki, "Formula-1 Azərbaycan Qran Prisi" yarışının başlanmasına çox az bir müddət qalıb. Əvvəlcədən verilən məlumat əsasında Bakı Şəhər Halqası deyilən marşurt üzrə tam hazırlıq işlərinin görülməsi üçün artıq bütün kəsişmələrdən avtomobillərin hərəkətinə məhdudiyyət qoyulub, istiqamət dəyişdirilib. Bu səbəbdən paytaxtın mərkəzi hissəsinə doğru, yəni Azneft meydanı, Neftçilər prospekti, Azadlıq meydanı, Bülbül prospekti, Qoşa Qala qapısı, Gənclər meydanı, Zərifə Əliyeva, Puşkin, Nizami, Rəsul Rza, Əziz Əliyev, İstiqlaliyyət və Niyazi küçələrində artıq avtomobillərin hərəkətinə tam məhdudiyyət qoyulub. Bu məhdudiyyət 13 iyun tarixinə kimi davam edəcək. Yarış bitdikdən sonra bu istiqamətlərə doğru bütün kəsişmələrdə olan beton maneələr aradan qaldırılacaq.

Sonxeber.az vasitəsilə bir daha avtomobil sürücülərinə müraciət edirik ki, mövcud şəraiti düzgün dəyərləndirsinlər. Hər il, hər zaman olduğu kimi bu il də tədbirin yüksək səviyyədə keçirilməsi üçün vətəndaş həmrəyliyini göstərsinlər. Bu istiqamətlərə doğru şəxsi avtomobillərdən istifadə etməyərək ictimai nəqliyyat vasitələri ilə hərəkət etməyə üstünlük verilməyi tövsiyə edirik.

Bundan əlavə, bəzi ərazilərdə hərəkətin dəyişikliyi ilə bağlı məlumat veririk. Belə ki, hazırda Səməd Vurğun və Füzuli küçələrinin kəsişməsindən Üzeyir Hacıbəyov küçəsi ilə kəsişən hissəyədək olan ərazi iki istiqamətli təyin edilib. Lermontov küçəsi ilə Axundov bağı istiqamətində, Şeyx Şamil küçəsi kəsişməsindən hərəkətin əksinə və Axundov parkı ətrafından Əhməd Cavad küçəsi ilə hərəkətin əksinə, Azərbaycan prospekti istiqamətinə hərəkət edilməsi nəzərdə tutulub.

Eyni zamanda, Azneft meydanı tərəfdə isə yalnız Bayraq meydanı istiqamətində hərəkət nəzərdə tutulub. Bakı Şəhər Halqası kimi tanınan ərazidə yaşayanlara da artıq məlumat verilib. Onların rahat gediş-gəlişi üçün şərait yaradılıb.

Hesab edirik ki, bu tədbir də yüksək səviyyədə başa çatacaq".

Aysel SƏFƏRZADƏ

Telegramda izləyin