Naxçıvanda qızılcaya qarşı peyvəndə başlanılıb

Naxçıvan Muxtar Respublikasında qızılcaya qarşı peyvəndə başlanılıb.

Bu barədə "Report"un yerli bürosu xəbər verir.

Könüllü aparılan peyvəndləmə 11-40 yaşlı şəxsləri əhatə edir.

Qeyd olunan əhali qruplarının vaksinasiyası üçün yaşayış yerləri üzrə uşaq və yaşlı qrupa aid əhaliyə ambulator-poliklinik xidmət göstərən tibb müəssisələrinə müraciət edilməsi tövsiyə olunur. 11-40 yaşlı əhali qruplarının yoluxmadan müdafiəsi üçün 1 dəfə vaksinasiya olunması nəzərdə tutulub.

Babək Rayon Mərkəzi Xəstəxanasının infeksionisti Vüsalə Səfərova bildirib ki, 2023-cü ilin payız mövsümü başlayandan qızılca xəstəliyinə yoluxma halları davam edir:

"Qızılca xəstəliyinə yoluxma əsasən peyvənd –vaksinasiyadan kənar qalan əhalidə müşahidə olunur. Buna görə də profilaktik tədbirlər həyata keçirilir.

Profilaktik tədbirlər çərçivəsində peyvənd təqviminə uyğun olaraq 10 yaşa qədər uşaqlar arasında aparılan vaksinasiya ilə yanaşı 11-40 yaş arası əhali arasında da vaksinasiyaya başlamışıq. Məqsəd yoluxma hallarının və xəstəliyin ağırlaşmasının qarşısının alınmasıdır".

Şahbuz Rayon Mərkəzi Xəstəxanasının baş həkimi Coşqun Babayev isə deyib ki, qızılca, məxmərək peyvəndi ilə yanaşı, həm də mövsümi qrip əleyhinə peyvənd vururlar:

"Gün ərzində 30-a yaxın vətəndaşımız peyvəndə gəlir. Qızılca xəstəliyi azyaşlılar arasında tək-tək olsa da var. Peyvənd təqviminə uyğun olaraq azyaşlılar qızılcaya qarşı peyvəndlənir".

Telegramda izləyin