Universitetlərdə qaib limitləri ləğv oluna bilərmi ? - AÇIQLAMA

Son günlər sosial şəbəkələrdə bəzi tələbələr universitetlərdə qaib limitinin ləğv olunmasını tələb edirlər. Universitetlərdə səhər növbəsinin dərsləri saat 08:00 - 8:30 arası başlayır və hər gün minlərlə tələbə yollarda kifayət qədər vaxt itirir, tıxac səbəbilə dərsə gecikir. Belə olan halda tələbə davamiyyət problemi ilə üzləşir. Qaib limitini keçən tələbə isə imtahana buraxılmır və o, avtomatik olaraq kəsilmiş hesab edilir. Bəs görəsən universitetlərdə qaib limitləri ləğv oluna bilərmi ?

Mövzu ilə bağlı Sonxeber.az – a açıqlama verən təhsil eksperti Vüsal Kərimli bildirib ki, qaib limitləri tələbələrin daha keyfiyyətli təhsil almaları üçün vacibdir:

"Bu xeyli zamandır müzakirə olunan bir mövzudur. Dünya təcrübəsinə nəzər yetirsək görərik ki, dərslərdə iştirak tələbənin keyfiyyətli təhsili üçün vacibdir. Bizdə universitetlər tələbələrə dərslərdə iştiraklarının qarşılığında 10 bal verir. Bu onların daha məsuliyyətli olması üçün atılan bir addımdır. Bəzən tələbələr bildirir ki, Avropada dərslərdə iştirak vacib deyil. Onlar qaib limitlərindən şikayət edirlər. Düşünürəm ki, tələbələrin dərsdə iştirakı vacibdir. Əgər tələbə dərslərdə iştirakla bağlı qaydalardan narazıdırsa, o zaman qiyabi təhsil alsın. Əyani təhsil seçimini özü edibsə, qaydalardan narazılıq etməməlidir. Bütün dərslərdə iştirak vacibdirmi ? Bəlkə də deyil. Amma universitetlər tələbələri dərslərə cəlb etmək, onları müəyyən biliklərə yiyələndirmək üçün bu qaydaları tətbiq edirlər. Əgər bu qaydalar olmasa, tələbələrdə rahatlıq yaranacaq. Bu da həm onların öz gələcəklərinə, həm də universitetin prestijinə zərər verəcək".

Çiçək Sadatova

Telegramda izləyin