Elzanın efirdə səsləndirdiyi şeirə görə kanala XƏBƏRDARLIQ OLUNUBMU? - RƏSMİ AÇIQLAMA

Xəbər verdiyimiz kimi, Əməkdar artist, Azərbaycan Yazıçılar Birliyinin (AYB) üzvü Elza Seyidcahanın efirdə səsləndirdiyi "Tüpürüm sizin ağzınıza" adlı "şeiri" sosial şəbəkələrdə müzakirələrə səbəb olub.Sözügedən şeirin efirdə səsləndirilməsi ictimaiyyətdə birmənalı qarşılanmayıb və narazılıq doğurub. Hətta bunu E.Seyidcahanın insanları təhqir etməsi kimi dəyərləndirənlər də var. Elza Seyidcahan "Tüpürüm sizin ağzınıza" adlı "şeiri" ATV telekanalının "Rəngarəng" verilişində səsləndirib.

Bəs Elza Seyidcahanın efirdə səsləndirdiyi şeirə görə, kanala xəbərdarlıq edilibmi? Məsələ ilə bağlı Audiovizual Şuranın Aparat rəhbəri Fazil Novruzov Sonxeber.az-a açıqlama verib:

"Elza xanımın səsləndirdiyi şeirə görə, kanala hər hansı bir xəbərdarlığın edilməsi nəzərdə tutulmayıb. Şeirdə səsləndirilən ifadələrə baxsaq, nələrsə yozmaq olar. Amma faktiki olaraq həmin şeir kanalda səsləndirilib, digər media subyektlərində yayımlanıb. Narazılıqlara görə Elza xanımı ölkədən qovası deyilik. Bu baxımdan kanala xəbərdarlığın olunması müzakirə mövzusu deyil".

Qeyd edək ki, yaranmış qalmaqalla bağlı Elza Seyidcahan AYB-nin üzvü kimi quruma çağırılıb, onunla söhbət aparılacaq.

Sevda Səfərova

Telegramda izləyin