Ata və oğlunun öldüyü hadisə ilə bağlı hökm oxundu

Ötən ilin noyabrında Ağsu dolaylarında ata və 15 yaşlı oğlunun ölümü ilə nəticələnən qəzanı törətmiş sürücüyə hökm oxunub.

"Qafqazinfo" xəbər verir ki, rayonun Padar kənd sakini 1999-cu il təvəllüdlü Həsən Həsənli Cinayət Məcəlləsinin 263.3-cü (2 və ya da ha çox şəxsin ölümü ilə nəticələnən yol-nəqliyyat hadisəsini törətmə) maddəsi ilə təqsirli bilinib.

Şəki Ağır Cinayətlər Məhkəməsinin hökmü ilə ona 5 il azadlıqdan məhrumetmə cəzası verilib. Cəzanın məntəqə tipli müəssisədə çəkilməsi qeyd olunub. Həmin cəzanın başa çatmasından sonra H.Həsənlinin 3 il nəqliyyat vasitəsi idarə etməsi də qadağan edilib.

Qeyd edək ki, hadisə vaxtı H.Həsənlinin idarə etdiyi "Mercedes-Benz" markalı avtomobil aşıb. Nəticədə Ağsu rayonu Cəlayır kəndindən olan 1974-cü il təvəllüdlü Əmir Ağaxan oğlu Xangəldiyev və 2008-ci il təvəllüdlü Məsud Əmir oğlu Xangəldiyev ölüblər, sürücü isə xəsarət alıb.

Ölən ata və oğul yolda H.Həsənlinin maşınına miniblər və Şamaxıya sənəd düzəltdirməyə gedirlərmiş.

Telegramda izləyin