XİN başçıları görüşür: Sülh müqaviləsi İMZALANACAQ? - ŞƏRH

BMT Baş Assambleyasının 79-cu sessiyası çərçivəsində ABŞ-nin dövlət katibi Entoni Blinkenin iştirakı ilə Azərbaycan və Ermənistan xarici işlər nazirləri Ceyhun Bayramov və Ararat Mirzoyan arasında görüş bu gün Nyu-York vaxtı ilə səhər saat 10.15-də keçiriləcək. Eyni zamanda Ermənistan tərəfi Azərbaycanla razılaşdırılmış maddələri imzalamağa dəvət edib.

Görüş zamanı sülh müqaviləsi ilə bağlı yekun razılıq əldə olunacaqmı? Mövzu ilə bağlı Sonxeber.az-a danışan hərbi ekspert Səxavət Məmmədli deyib ki, Amerika və Ermənistan tərəfi tez-tez sülh müqaviləsi haqqında danışırlar. Amma reallıq ondan ibarətdir ki, bu "sülh"dən danışmaqdır:

"Biz əməldə bunu görmürük. Amerika tərəfi prosesi öz əlinə almaq istəyir. İndiki məqamda XİN başçılarının görüşü zamanı sülh müqaviləsinin əldə olunacağını, həyata keçirildiyini gözləmək doğru deyil. Bu sadəcə olaraq XİN başçılarının növbəti görüşlərindən biri olacaq. Ölkə başçısının parlamentdəki çıxışı zamanı danışıqlar prosesinin hansı həddə olduğunu görmək mümkündür. Hər iki tərəf silahlanmaya gedir".

Ekspertin sözlərinə görə, Azərbaycan silah arsenalını daha da genişləndirməyə başlayıb. Azərbaycanın ən böyük tarixi yatırımlarından biri JF-17C qırıcı təyyarələrinin alınması oldu:

"Düşünürəm ki, Azərbaycanın aviaparkının yenilənməsinə ehtiyac var idi. Silahlanma prosesinin davam etdiyi bir vaxtda hansısa sülh müqaviləsinin imzalanmasını gözləmək doğru yanaşma deyil. Belə görüşlərin keçiriləcəyini yenə də görəcəyik. Faktiki olaraq iki ölkə arasında çərçivə sazişinin imzalanması mümkün variantdır. Nəzərə almaq lazımdır ki, sülh müqaviləsi imzalansa belə regionda gərginlik bitməyəcək".

Telegramda izləyin