"Tələbələr oxuduqları yerə uyğun geyinməlidirlər" - AÇIQLAMA

Son zamanlar sosial şəbəkələrdə universitet tələbələrinin geyimlərinin müzakirə olunur. Belə ki, universitet müəllimləri tələbələrin geyimlərinə qarışır, açıq,qısa geyinənlərin dərsə buraxılmayacağını deyirlər.

Bəs görəsən müəllimlərin tələbələrin geyiminə qarışmağa ixtiyarı varmı?

Mövzu ilə bağlı Sonxeber.az – a açıqlama verən təhsil eksperti Elmin Nuri bildirib ki, tələbələr oxuduqları yerə uyğun geyinməlidirlər:

"Biz bu məsələyə bir neçə istiqamətdən yanaşa bilərik. Birinci istiqamət ali təhsil müəissiələrinin daxili qayda-qanunudur. İkincisi, haqqında bəhs edilən müəllimlərin mənəvi və mental dəyərlərə olan baxışıdır. Üçüncüsü isə insanların geyimləri ilə getdikləri məkan arasındakı uyğunsuzluqdur. Şəxsən mən məsələyə sırf üçüncü prizmadan baxıram. Mənə müəllimlərə haqq qazandırmaq üçün səbəb verən əsas detal geyim tərzinin mühitə görə uyğunlaşdırılmasıdır. Tələbələr oxuduqları yerə uyğun geyinməlidirlər. Biz bəzən Avropadan danışırıq. "Orda sərbəstlik var", "Heç kəs heç kəsin geyiminə qarışa bilməz" və.s deyirik. Mən də deyirəm ki, Avropada geyimlər məkana uyğun seçilir. Məsələn: teatrın, sərginin, piknikin, tədbirin, əyləncənin – hamısının öz geyim tərzi var. Mən məkana uyğun geyinməyin tərəfdarıyam. Oxuduğun yer eyni zamanda təmsil etdiyin yerdir. Təmsil etdiyin yerə isə uyğunsuz şəkildə getmək doğru deyil".

Çiçək Sadatova

Telegramda izləyin