Gənc müəllimlər məcburi olaraq kənd və rayon məktəblərinə göndərilə bilər - AÇIQLAMA

Günümüzdə ən aktual problemlərdən biri də rayonlarda müəllim çatışmazlığı ilə bağlıdır. Hansı ki, ixtisaslı kadrların bölgələrdə fəaliyyət göstərməkdən imtina etməsi, zamanla müxtəlif problemlərə yol açıb və açmaqda da davam edir. Bəs,buna səbəb nədir? Və bu problemin həllini tapması üçün hansı addımlar atılır ya da atılmalıdır?

Mövzu ilə bağlı Sonxeber.az-a danışan təhsil eksperti Kamran Əsədov bildirdi ki, müəllimlərin rayonlarda çalışmaq istəməməsinin bir neçə səbəbləri var:

"Kənd və rayon məktəblərinin keyfiyyətli təhsillə təmin olunması üçün kifayət qədər ixtisaslı müəllim heyətinin olmaması ciddi təhsil fərqliliklərinə səbəb olur. Şəhərdən çıxmayan müəllimlərin böyük hissəsi isə əsasən şəhərlərdə daha yaxşı iş şəraiti və sosial imkanların olmasını əsas gətirir. Bu durum həm təhsil keyfiyyətinə, həm də regionların inkişafına mənfi təsir göstərir.

Müəllimlərin rayonlarda çalışmaq istəməməsinin bir neçə əsas səbəbi var. Birincisi, infrastruktur və həyat şəraitidir. Şəhərdə yaşam daha çox sosial və iqtisadi imkanlar təklif edir, müəllimlərin ailələrinə, uşaqlarına daha yaxşı təhsil və tibbi xidmət imkanı verir. İkincisi, sosial mühitin fərqli olmasıdır. Şəhər mühitinə alışmış müəllimlər rayonlarda uyğunlaşmaqda çətinlik çəkə bilər. Ailələrini şəhərdə qoyub rayonlara gedən müəllimlər isə ailədən uzaq qalmağın yaratdığı psixoloji çətinliklərlə üzləşirlər. Üçüncü əsas səbəb isə maddi imkanlardır. Şəhərdə işləyən müəllimlərin maaşı eyni olsa da, şəhərdə əlavə gəlir imkanları, dərs keçmək, təlim və fərdi dərslər vermək kimi yollar var. Rayonlarda isə bu tip əlavə gəlir mənbələri daha məhduddur".

Ekspert açıqlamasında onu da qeyd etdi ki, hazırda müəllimlərin rayonda fəaliyyət göstərməsi ilə bağlı müəyyən dərəcədə addımlar atılır:

"Bu problemin həlli yollarından biri, dövlətin müəllimlər üçün xüsusi təşviq proqramları hazırlamasıdır. Hazırda müəyyən dərəcədə bu istiqamətdə addımlar atılsa da, bunlar yetərsizdir. Məsələn, müəllimlərin rayonlarda çalışmağa həvəsləndirilməsi üçün maaşlarda fərqləndirmə tətbiq olunmalı və mənzil şəraiti təklif olunmalıdır. Belə təşviq proqramları regionlara müəllim axınını artırmaq üçün əsas addımlardan biri ola bilər.

Bundan başqa, gənc müəllimlərin məcburi olaraq kənd və rayon məktəblərində təcrübə keçmələri sistemi tətbiq oluna bilər. Bu həm müəllimlərin peşəkar bacarıqlarının inkişafına, həm də rayon məktəblərinin qısa müddətli olsa belə ixtisaslı kadrlarla təmin olunmasına kömək edərdi. Bu təcrübə, məsələn, Finlandiyada geniş şəkildə tətbiq olunur və uğurlu nəticələr verir.

Eyni zamanda, rayonlardakı məktəblərdə infrastrukturu yaxşılaşdırmaq da vacibdir. Müəllimlərin yaxşı şəraitdə işləməsi üçün məktəblər müasir tədris vasitələri ilə təmin olunmalı, müəllimlərin yaşam şəraitləri yüksəldilməlidir.

Müəllimlərin rayonlarda çalışmaq istəməməsinin qarşısını almaq üçün görülən tədbirlərə baxdıqda, təhsil naziri tərəfindən bəzi təşviqlər elan olunub. Lakin bu tədbirlər daha geniş miqyaslı və davamlı olmalıdır".

Vüsalə İbrahimli

Telegramda izləyin