"Həyat yoldaşını "xəyanət elədi" deyib öldürən kişilər bunu şərəf hesab edirlər" - AÇIQLAMA

Abşeron rayonunun Qobu qəsəbəsində həyat yoldaşı və körpə qızını öldürməkdə təqsirləndirilən Fərid Hüseynlinin cinayət işi üzrə məhkəmə prosesi başa çatıb.
Sumqayıt Ağır Cinayətlər Məhkəməsində hakim Nurəddin Hüseynlinin sədrliyi ilə keçirilən iclasda F.Hüseynli ömürlük azadlıqdan məhrum edilib.

O həyat yoldaşının ona xəyanət etdiyi üçün bu əməli törətdiyini və peşman olmadığını bildirib.

Bəs görəsən kişilərin "xəyanət" üstündə belə cinayətlər törətməsinin səbəbi nədir?

Mövzu ilə bağlı Sonxeber.az – a açıqlama verən psixoloq Aytən Ələkbərova bildirib ki, kişilər belə hadisələri şərəf və ləyaqət məsələsi hesab etdikləri üçün bu addımı atırlar:

"Həyat yoldaşını "xəyanət elədi" deyib öldürən kişilər bunu qürur və şərəf məsələsi hesab edirlər. Onlar düşünür ki, əgər arvadım mənə xəyanət edibsə onun yaşamağa haqqı yoxdur. Onlar qadın mənə niyə xəyanət etdi sualını özlərinə vermədikləri üçün, bu suala cavab tapa bilmədikləri üçün bu yola əl atırlar. Onların tək düşüncəsi odur ki, əgər həyat yoldaşım mənə xəyanət edibsə o bu həyatda olmamalıdır. Müxtəlif psixotiplər var. Bəziləri bunu dərhal edə bilər, bəziləri planlı şəkildə bir müddət sonra edə bilər. Elələri də var ki, heç reaksiya vermədən uzaqlaşa bilər. Amma paranoyal durumda olan psixotiplər həyat yoldaşının onlara xəyanət elədiyini düşünürsə sadəcə həmin qadını öldürməklə öz əsəbini soyuda, kişiliyini özünə sübut edə bilər".

Çiçək Sadatova

Telegramda izləyin