Dəhşətli lift qəzası 45 yaşlı qadını həyatından etdi

Braziliyanın San-Paulu şəhərində baş verən faciəvi lift qəzası bir qadının həyatına son qoyub.

Sonxeber.az xarici mediaya istinadən xəbər verir ki, 45 yaşlı Adriana Maria de Jesus işə gedərkən liftdə dəhşətli qəza keçirib.

Təhlükəsizlik kamerası görüntüləri hadisənin dəhşətli təfərrüatlarını ortaya çıxarıb. Adriana beşinci mərtəbədən enərkən lift qəflətən idarəetmədən çıxıb və sürətlə aşağı düşüb. Hadisə zamanı liftdə daha iki kişi sərnişin olub.

Adriananın əri Gildelio Alves do Santos həmin binanın qapıçısı işləyib. O həyat yoldaşının son anlarını təhlükəsizlik kameraları vasitəsilə izləməli olub. "Arvadımın yuxarı qalxdığını gördüm, hər şey normal idi. Amma o enəndə dəhşətə gəldim", - Gildelio aldığı travmanı izah edib.

Qəzadan sonra ağır xəsarətlərlə xəstəxanaya çatdırılan Adriana bir həftə sonra dünyasını dəyişib. Liftdə olan digər iki sərnişin xoşbəxtlikdən sağ qalıb.

Hadisə ilə bağlı istintaq başladılıb. Araşdırma zamanı məlum olub ki, lift 60 ildən artıqdır təmir olunmayıb. Səlahiyyətlilər hadisəni şübhəli ölüm kimi qiymətləndirir.

Telegramda izləyin