Sürücü istifadə etdiyi tankeri qəsdən yoldakı maşınların üstünə sürdü - VİDEO

Çinin Qingdao şəhərində sement tankeri sürücüsü qəsdən yoldakı avtomobillərə çırpılıb və böyük dağıntılar törədib.

Sonxeber.az türk mediasına istinadən xəbər verir ki, oktyabrın 23-ü axşam saatlarında Renmin küçəsində baş verən insident zamanı azı 6 avtomobilə ziyan dəyib.

Aqressiv sürücü sükan arxasında olarkən özünü videoya çəkib. Kadrlarda onun "Kommunist Partiyası məni yaşatmayacaq, insanları öldürəcəm" deyə qışqıraraq digər maşınlara çırpıldığı görünür. Sosial şəbəkələrdə paylaşılan videolarda tankerin qarşı zolağa keçərək təsadüfi avtomobillərə çırpılması və avtobusu yararsız hala salması anları əks olunub.

Hadisə şahidlərinin lentə aldığı görüntülərdə bəzi nəqliyyat vasitələrinin tamamilə əzildiyi görünür. Polis qısa müddətdə tanker sürücüsünü saxlayıb.

Hadisə Çin sosial mediasında böyük əks-səda doğurub. Günahsız insanlara zərər verən bu şəxsin əməlinin qəbuledilməz olduğunu bildirən istifadəçilər hadisəyə aydınlıq gətirilməsini istəyiblər.

Səlahiyyətlilər tərəfindən başladılan araşdırmalar davam etsə də, hadisədə insan itkisinin olub-olmadığı hələlik açıqlanmayıb.

Telegramda izləyin