Bu şəxslərin təhsil haqqının dövlət tərəfindən qarşılanması məsələsi Milli Məclisdə müzakirə olunmalıdır - PSİXOLOQ

Son günlər tez-tez azyaşlı qızların evləndirilməsi xəbərləri ilə rastlaşırıq. Bəzi qızlarımız tələbə olmalı yaşda, ailələrinin zoru ilə gəlin olurlar. Bəs görəsən təhsildən yayındırılıb evləndiriilmək azyaşlı qızlarımızın psixologiyasına necə təsir edir?

Mövzu ilə bağlı Sonxeber.az – a açıqlama verən psixoloq Aytən Ələkbərova bildirib ki, bu travma bir ömür onlarla yaşayır.:

"Bir çox qızlarımız var ki, təhsil almaq istəyirlər. Bəzən ailələrin buna qəti şəkildə yox demələri qızlarımızda həyatdan küskünlüyə gətirib çıxarır. Onlar təhsildən yayındırılıb evliliyə məcbur edilir və məlum məsələdir ki, qızlarımız bunu istəmir, özlərini hazır hiss etmirlər. Amma valideyinlər bunu başa düşmür. Onlar deyir ki, imkanımız yoxdur sən ailə qursan daha yaxşı olar. Yükümüz azalar. Bu cür durumlarla qarşı-qarşıya gəldiyi zaman hətta intihara belə sürüklənən qızlarımız olub. Onlar çıxış yolunu intiharda görüblər. Fərqi yoxdur, istər qız olsun, istər oğlan bu situasiyada biz bacardığımız qədər onlara dəstək olmalıyıq. İmkanı çatan şəxslər ehtiyacı olan qızlarımızın təhsil haqlarının ödənilməsinə kömək etmək üçün addımlar atmalıdır. Amma təbiidir ki, bunu hər dəfə etmək olmur. Çünki bilirik ki, təhsil haqları da həddindən artıq yüksəkdir. Bəzi hallarda valideyinləri də qınamaq olmaz. Məsələn rayondan gələn tələbələrin ev pulu, yemək pulu və illik təhsil haqqını da nəzərə alsaq, bəzi ailələrin həqiqətən də buna maddi imkanı çatmır.
İnsanlar həmişə xoşbəxtliklərini alınmayan şeylərə fokuslayirlar və sonra da düşünürlər ki, mən artıq xoşbəxt deyiləm. Bu travma da həmin uşaqlarda bir ömür qalır və qarşılarına çıxan bütün çətinliklərdə "Mən təhsil ala bilmədim deyə bütün bunlar başıma gəlir" düşüncəsinə qapılırlar. Amma insan istəsə elə özü bir çox şeylərin öhdəsindən gələr. Yəni tutaq ki, 17 yaşında təhsil ala bilmədin, amma sən 25 yaşında da oxuya bilərsən. Daha məntiqli, yetişkin halınla da təhsil ala bilərsən. Heç nə üçün heç vaxt gec deyil. Mən düşünürəm ki, potensiallı, savadlı amma oxumağa imkanı çatmayan qızların təhsil haqqının dövlət tərəfindən qarşılanması məsələsi Milli Məclisdə müzakirə olunmalıdır".

Çiçək Sadatova

Telegramda izləyin