Cərrahların xalatı niyə ağ yox, yaşıl, yaxud mavidir?

Bildiyiniz kimi, tibb işçiləri ağ xalat geyinirlər. Bu rəng təmizlik, sterillik və gigiyena simvoludur. Ancaq bütün tibb işçiləri ağ xalat geyinmir. Məsələn, əməliyyat otaqlarındakı anestezioloji və cərrahi qrupların geyimləri yaşıl və ya göy rəngdədir. Bəs onları fərqləndirən nədir?

Lent.az xarici mediaya istinadla bildirir ki, əvvəlcə bu komandalar digər tibb işçiləri kimi ağ xalat geyinirdilər. Lakin 20-ci əsrin ikinci yarısında əməliyyat edən həkimlər tədricən yaşıl və ya mavi formalara keçməyə başladılar.

Əməliyyat zamanı tibb işçisi qəfil baxışlarını xəstənin qanının tünd rəngindən həmkarının ağ xalatına çevirərsə, bir anlıq kor ola bilər. Ancaq yaşıl və ya mavi rənglər belə bir təsirə səbəb olmur. Bunun səbəbi, onların rəng spektrində qırmızıya zidd olması və buna görə də əməliyyatlar üçün daha uyğun olmasıdır.

Yəni yaşıl və ya mavi forma cərrahların gözlərinin sayıqlığını stimullaşdırmağa kömək edir. Onları qanın qırmızı rənginə daha həssas edir, əməliyyat zamanı xətaların baş vermə ehtimalını azaldır. Bu amil əməliyyat otaqlarında cərrah və anestezioloqların işində çox vacibdir.

Telegramda izləyin