ABŞ-də unikal əməliyyat: Xəstənin burnundan və gözündən girməklə bədənindəki ölümcül şiş çıxarıldı

ABŞ-də 18 yaşlı Karla Flores cisimləri ikiqat ölçüdə görməyə başlayanda təsəvvür belə edə bilməzdi ki, bu, nadir və ölümcül xəstəliyin ilk əlamətidir. Görməsində qeyri-adi dəyişikliklərdən narahat olan qız oftalmoloqa müraciət edib və həkim ciddi problemdən şübhələnərək onu dərhal neyrocərraha yönləndirib.

Oxu.Az-ın xəbərinə görə, bu barədə "CBS News" nəşri yazıb.

Məlumata görə, sonrakı müayinə Karlanın həyatı bahasına başa gələ biləcək diaqnozu üzə çıxarıb.

Karla həkimlərdən dəhşətli diaqnozu eşidib - xordoma, beyin sapına (beyin və onurğa beyni arasında körpü rolunu oynayan, həyati əhəmiyyətli funksiyaları tənzimləyən mərkəzi sinir sisteminin bir hissəsidir - red.) təsir edən nadir bədxassəli şiş. Tibbi statistikaya görə, ABŞ-də hər il cəmi 300-ə yaxın belə hal qeydə alınır. Xordomalar embrion xordasının qalıqlarından inkişaf edir, aqressiv böyümə və yüksək residiv ehtimalı ilə xarakterizə olunur.

"Şiş kəllə sinirlərinə çox təzyiq edirdi və bu da görmə problemlərinə səbəb olurdu", - deyə mürəkkəb halın müalicəsini öz üzərinə götürən Merilend Universiteti Tibb Mərkəzinin neyrocərrahı Mohamed Labib bildirib.

Mütəxəssis, həyati vacib sinir strukturlarına zərər vermədən şişi tamamilə çıxarmaq üçün ardıcıl iki əməliyyatı əhatə edən kompleks plan hazırlayıb.

Karlanın hekayəsindəki taleyüklü dönüş isə ilk əməliyyatdan əvvəl səhər baş verib. Əməliyyatdan əvvəl rutin MRT müayinəsi zamanı texnik təsadüfən kameranı yerindən tərpədib və bu da gözlənilməz kəşfə səbəb olub - görüntülərdə onurğanın yuxarı hissəsində, onurğa beyninin yaxınlığında yerləşən ikinci xordoma ortaya çıxıb. Bu şiş artıq boyun fəqərələrinə nüfuz etmişdi və birincisindən heç də az təhlükə yaratmırdı.

"Əgər biz ikinci şişi vaxtında tapmasaydıq, nəticələr fəlakətli ola bilərdi - tam iflic və ya hətta ölüm", - deyə Karlanın özü bu təsadüfi görüntünün nə qədər vacib olduğunu izah edərək qeyd edib.

Doktor Labib əvvəlcə beyin sapındakı ilk xordomanı çıxarmaq qərarına gəlib. Əməliyyat uğurlu keçib - şiş kombinə edilmiş üsulla çıxarılıb, qismən ənənəvi yanaşma ilə, qismən də burun keçidləri vasitəsilə. Əməliyyatlar arasındakı zamanda neyrocərrah ikinci şişi diqqətlə araşdırıb və onu çıxarmağın ən optimal yolunu tapmağa çalışıb.

Vəziyyət çıxılmaz təsir bağışlayırdı: onurğa beyninin zədələnməsi riski səbəbindən şişə arxadan onurğa vasitəsilə yaxınlaşmaq mümkün deyildi, burun vasitəsilə giriş isə manipulyasiya üçün kifayət qədər sahə təmin etmirdi. Doktor Labibin həmkarlarından biri hətta Karlaya kömək etməyin mümkün olmadığı qənaətinə gəlib və palliativ müalicə ilə kifayətlənməyi tövsiyə edib. Lakin neyrocərrah təslim olmaqdan imtina edib.

"Mən bir həll yolunu tapana qədər şəkilləri və anatomik atlasları öyrənmək üçün bir neçə yuxusuz gecə keçirdim", - deyə doktor Labib xatırlayıb.

Onun innovativ planı şişə gözün yan nahiyəsindən keçərək çatmağı nəzərdə tuturdu ki, bu, belə hallarda nadir istifadə olunan üsuldur. Belə bir yanaşmanın nəzəri mümkünlüyünə əmin olan həkim öz planını Karlaya və onun ailəsinə təqdim edib.

"Qızın anası gözyaşlarını saxlaya bilmədi, Karla qorxmuşdu, amma mübarizə aparmağa qəti qərarlı idi", - deyə həkim bildirib.

Ailə neyrocərrahın təcrübəsinə inanıb və riskli əməliyyata razılıq verib.

Əməliyyat otağına yüksəksəviyyəli mütəxəssislərdən ibarət bir qrup toplanıb. Plastik cərrah Kalpeş Vakariya virtuoz şəkildə aşağı göz qapağının yaxınlığındakı membranda kəsik edib, göz yuvasının və yanaq sümüyünün bir hissəsini çıxararaq şişə giriş yaradıb. Daha sonra doktor Labib baş və boyun cərrahı Andrea Hebert ilə birlikdə fəqərələri diqqətlə deşərək xordomanı tamamilə çıxarıblar.

Əməliyyat 20 saat davam edib və həkimlərin dediyinə görə, ideal keçib. Şiş çıxarıldıqdan sonra titan lövhə ilə göz yuvası bərpa edilib, yanağın rekonstruksiyasında isə xəstənin budundan götürülmüş sümük toxumasından istifadə edilib.

Bu gün Karla Flores əməliyyatlardan sonra tam sağalıb və öz vəziyyətini izləmək üçün müntəzəm müayinələrə davam edir. Onunla bağlı bu hal mərkəzi sinir sisteminin mürəkkəb şişlərinin müalicəsində innovativ yanaşmanın nümunəsi və müasir neyrocərrahiyyədə qeyri-standart düşüncənin əhəmiyyəti kimi tibb dərsliklərinə daxil olub.

Telegramda izləyin