Beynin qocalmasını ləngidən qeyri-adi üç məhsul

Alimlər müəyyən ediblər ki, yaşıl çay, qoz və mankay adlı su bitkisindən ibarət gözlənilməz bir trionun qəbulu beynin gəncliyini qorumağa kömək edə bilər.

Sonxeber.az xəbət verir ki, mankay dünyanın ən kiçik yarpaqlı tərəvəzidir (təxminən 0,5 mm ölçüdə), kök və gövdəsi yoxdur və su hövzələrinin səthində inkişaf edir.

"Fox News"un yazdığına görə, Harvard Universiteti, İsrailin Ben-Qurion Universiteti və Almaniyanın Leypsiq Universitetindən olan alimlər 18 aylıq randomizə edilmiş tədqiqat zamanı təxminən 300 yetkin şəxsin qan zülallarını araşdırıb və onları iştirakçıların "beyin yaşı"nı qiymətləndirən MRT nəticələri ilə müqayisə ediblər. Nəticələr "Clinical Nutrition" jurnalında dərc olunub.

Birinci qrup aşağı miqdarda qırmızı və emal olunmuş ət, bol bitki mənşəli məhsullar üzərində qurulan yaşıl Aralıq dənizi dietasına əməl edib. İkinci qrup ənənəvi Aralıq dənizi dietasına riayət edərək qırmızı əti toyuq və balıqla əvəzləyib. Üçüncü qrup isə sağlam qidalanma üzrə standart tövsiyələrə əməl edib.

Nəticədə yaşıl Aralıq dənizi dietasına əməl edən iştirakçılarda beyin qocalması ilə əlaqələndirilən galektin-9 zülalının səviyyəsində ən böyük azalma müşahidə olunub və MRT görüntüləri onların real yaşlarına nisbətən daha "gənc" beyin göstərib.

"Galektin-9 səviyyəsinin azalması, yaddaş itkisi və Alzheimer kimi neyrodegenerativ xəstəliklərlə əlaqəli olan idrak funksiyalarının zəifləməsinə səbəb olan iltihabi proseslərin qarşısının alınması demək ola bilər", deyə tədqiqatın aparıcı müəllifi Ayris Şay "Fox News Digital"a bildirib.

Şayın sözlərinə görə, yaşıl çaydakı antioksidant birləşmələr, qozdakı faydalı yağlar və polifenollar bu təsirlərə töhfə verə bilər, mankay rəsqası isə bağırsaq-beyin əlaqələrini və metabolik prosesləri dəstəkləyir.

Mankay alimlərin diqqətini onun son dərəcə zəngin qida tərkibi səbəbindən cəlb edib. O, asan mənimsənilən B12 vitamini və dəmir ehtiva edən tam dəyərli bitki mənşəli zülaldır.

Eyni tədqiqat qrupunun əvvəlki işləri mankay bitkisini qan şəkərinə nəzarətin yaxşılaşması, metabolizmin güclənməsi, bağırsaq sağlamlığının artması və iltihabın azalması ilə əlaqələndirmişdi – bütün bunlar beyin və idrak funksiyalarına təsir edə bilər.

Bununla yanaşı, yaşıl çay və qozun özləri də mankay bitkisi əlavə edilmədən böyük müsbət təsir göstərib. Mankayın tapılması isə kifayət qədər çətindir.(qaynarinfo)

Telegramda izləyin