Qocalmanı sürətləndirən üç gündəlik vərdiş

Qocalmanı hissolunmaz şəkildə sürətləndirən üç gündəlik vərdiş açıqlanıb.

Oxu.Az bildirir ki, bu barədə "LEVITA" beynəlxalq balet və dartınma studiyaları şəbəkəsinin həmtəsisçisi və məşqçi Kseniya Qufranova "Lenta.ru" nəşrinə müsahibəsində danışıb.

Qufranovanın sözlərinə görə, qocalmanın əsas amili oturaq həyat tərzidir. Fiziki aktivliyin olmaması əzələ tonusunun azalmasına səbəb olur, testosteron və endorfin ifrazını çətinləşdirir.

"Əgər biz işdə əzələlərimizi istifadə etməsək, orqanizm enerji sərfiyyatını azaltmağa çalışır və onları qidalandırmağı dayandırır. Bu zaman əzələ atrofiyası prosesi işə düşür, qan və limfa axını azalır və nəticədə, maddələr mübadiləsi yavaşıyır", - deyə məşqçi izah edib.

O həmçinin yuxu və istirahət rejiminə riayət etməyi tövsiyə edib.

Mütəxəssisin sözlərinə görə, yuxu çatışmazlığı səbəbindən melatonin hormonu ifrazı azalır və kortizol səviyyəsi artır. Əgər insan xroniki olaraq kifayət qədər yuxu almırsa, hormonal balanssızlıq müxtəlif xəstəliklərin inkişafına, diqqətin pozulmasına, daimi yorğunluğa, qıcıqlanmaya və gözlərin altında torbaların yaranmasına səbəb ola bilər.

Qufranovanın sözlərinə görə, qocalmanı sürətləndirən və ilk baxışda zərərsiz görünən üçüncü vərdiş qadcetlərin düzgün olmayan vəziyyətdə istifadəsidir. İnsan notbuk və ya telefondan istifadə edərkən başını aşağı əyirsə, bu, boyun gərginliyinə, qamətin əyilməsinə, üz və boyun əzələləri tonusunun azalmasına, vaxtından əvvəl qırışların yaranmasına, buxağın əmələ gəlməsinə və damar sıxılmasına gətirib çıxara bilər. Düzgün olmayan poza səbəbindən hüceyrələr və toxumalarda oksigen çatışmazlığı yaranır, üz rəngi isə solğunlaşır.

Telegramda izləyin