Tokioda sauna yanğınında gənc cütlük həyatını itirdi

Yaponiyanın paytaxtı Tokioda yerləşən bir saunada baş verən yanğın nəticəsində içəridə qalan gənc cütlük həyatını itirib. Hadisə Tokionun Minato rayonunun Akasaka bölgəsində fəaliyyət göstərən özəl "Sauna Tiger" adlı müəssisədə qeydə alınıb.

Sonxeber.az xarici mediaya istinadən xəbər verir ki, bazar ertəsi günorta saatlarında saunada yanğın baş verib. Həmin vaxt saunada olan 37 yaşlı Yoko Matsuda və 36 yaşlı Masanari Matsuda yanğın zamanı içəridə qalıblar. Saat 12:25 radələrində binanın yanğın siqnalizasiyasının işə düşməsindən sonra hadisə yerinə çoxsaylı yanğınsöndürən və təcili tibbi yardım briqadaları cəlb olunub.

Yanğının səbəbi hələlik dəqiq müəyyən edilməsə də, alov qısa müddətdə nəzarət altına alınıb. Axtarışlar zamanı Matsuda cütlüyü sauna otağında huşsuz vəziyyətdə tapılıb. Xəstəxanaya çatdırılan cütlük həkimlərin bütün səylərinə baxmayaraq xilas edilə bilməyib.

Aparılan ilkin araşdırmalarda saunanın içərisindəki fövqəladə vəziyyət düyməsinin yanğın zamanı aktiv olmadığı, giriş qapısının qolunun isə həm içəridən, həm də çöldən qırılmış vəziyyətdə olduğu müəyyən edilib. Polis yanğın siqnalı işə düşənədək cütlüyün içəridə çarəsiz qaldığını ehtimal edərək səhlənkarlıq şübhəsi ilə genişmiqyaslı araşdırmaya başlayıb.

Hadisədən sonra fəaliyyətini müvəqqəti dayandıran "Sauna Tiger" rəhbərliyi ictimaiyyətdən üzr istəyərək bildirib ki, polis və yanğınsöndürmə xidmətlərinin araşdırması davam edir və müəssisə səlahiyyətli qurumlarla tam əməkdaşlıq edir.

Telegramda izləyin