Məktəbdə tənəffüs zənginin dini mahnı ilə əvəz olunması etirazlara səbəb olub

Türkiyənin Kocaeli vilayətinin Derince rayonunda yerləşən Çenesuyu məktəbində tənəffüs zənginin dini mahnı ilə əvəz olunmasına etiraz edən valideyn Soner Akbal İstanbulda saxlanılıb.

Sonxeber.az türk mediasına istinadən xəbər verir ki, Akbal məktəb direktorunun yanında çəkiliş edərək qərara etiraz edib. O, çıxışında "Bu etdiyiniz qanunsuzluqdur, yanlışdır. Bura Kəbədir?" ifadələrini işlədib.

Soner Akbalın ailə ziyarəti üçün getdiyi İstanbulda axşam saatlarında saxlanıldığı bildirilir. Qeyd olunur ki, o, daha əvvəl sabah üçün Kocaeli Emniyet Müdürlüğünə ifadə verməyə çağırılıb. Buna baxmayaraq, barəsində saxlanılma tədbiri tətbiq edilib.

Saxlanılma faktını Murat Emir sosial media hesabında açıqlayıb. O bildirib ki, Akbalın qaçma ehtimalı olmayıb və ifadə verməyə çağırıldığı halda saxlanılması doğru deyil.

Emir paylaşımında qeyd edib ki, qərara etiraz edən bir valideynin "təhlükəli cinayətkar kimi" saxlanılması suallar doğurur. O, məsələni izlədiklərini və hüquqi prosesin diqqətdə saxlanılacağını vurğulayıb.

Hadisə ilə bağlı rəsmi qurumlar tərəfindən hələlik əlavə açıqlama verilməyib.

Telegramda izləyin