73 yaşlı qadın 38 saat sonra tapıldı

Bartın vilayətinin Ulus rayonu ərazisində itkin düşən 73 yaşlı Döndü Adalı 38 saat sonra donmaq üzrə olduğu halda tapılıb.

Sonxeber.az türk mediasına istinadən xəbər verir ki, Döndü Adalı iki gün əvvəl otlamaq üçün buraxdığı heyvanları gətirmək məqsədilə evdən çıxıb. Lakin uzun müddət geri qayıtmadığı üçün ailə üzvləri 112 Təcili Çağrı Mərkəzi ilə əlaqə saxlayaraq yardım istəyiblər.

Hadisə yerinə səhiyyə əməkdaşları, AFAD və jandarma əməkdaşları cəlb olunub. Eyni zamanda kənd sakinləri də axtarış-xilasetmə işlərinə dəstək veriblər.

Axtarışlar nəticəsində Döndü Adalı kənddən təxminən 3 kilometr uzaqlıqda yerləşən yamaclıq ərazidə, itkin düşməsindən 38 saat sonra tapılıb. Məlum olub ki, qadın yamacdan yıxıldığı üçün geri qayıda bilməyib.

Onun hipotermiya keçirmək üzrə olduğu müəyyən edilib. Donmaq təhlükəsi ilə üzləşən qadına jandarma əməkdaşları öz gödəkçələrini verib və onu yorğana bürüyüblər.

Döndü Adalı təcili tibbi yardım maşını ilə Bartın Dövlət Xəstəxanasına çatdırılıb. Hazırda onun müalicəsi davam edir və vəziyyətinin ağır olduğu bildirilir.

Telegramda izləyin