Virus, yoxsa ZƏHƏRLƏNMƏ? - Necə ayırmaq lazımdır?

Qusma, ishal, qarın ağrısı və halsızlıq kimi əlamətlər həm qida zəhərlənməsi, həm də virus infeksiyaları zamanı ortaya çıxa bilər və bu səbəbdən onları yalnız simptomlara əsasən ayırmaq həmişə mümkün olmur. Xüsusilə yay aylarında bu əlamətlərlə bağlı müraciətlərin artması vətəndaşların ilkin fərqləndirmə barədə məlumatlı olmasını vacib edir.

Bəs, əlamətlərin nə qədər müddət sonra başlaması, xəstəliyin davametmə müddəti və digər müşayiətedici simptomlar qida zəhərlənməsi ilə virus infeksiyasını fərqləndirməyə nə dərəcədə kömək edir və hansı hallarda mütləq həkimə müraciət olunmalıdır?
Mövzu ilə bağlı Sonxeber.az-a açıqlama verən tibb eksperti Adil Qeybulla bildirib ki, ümumiyyətlə, öskürək, ishal və qarın ağrısı kimi şikayətlər çoxsaylı xəstəliklərin əlaməti ola bilər.

"Bunları insanın özü fərqləndirməsi mümkün deyil, diaqnozu həkim müəyyənləşdirir. Konkret diaqnozun qoyulması üçün klinik protokollar və müvafiq yol xəritələri mövcuddur və həkim beynəlxalq prinsiplərə əsaslanaraq xəstənin vəziyyətini qiymətləndirir. Ona görə də insanın öz şikayətinə əsasən xəstəliyi müəyyənləşdirməsi və buna uyğun dərman qəbul etməsi qətiyyən yolverilməzdir. Qarın boşluğunda səbəbsiz ağrılar və ishal müxtəlif xəstəliklərdən, o cümlədən xoralı kolit və Kron xəstəliyindən qaynaqlana bilər. Bunun səbəbini yalnız həkim müayinədən sonra müəyyən edə bilər. Bu səbəbdən hər hansı ciddi və davamlı şikayət müşahidə olunursa, mütləq həkimə müraciət edilməli və diaqnoz mütəxəssis tərəfindən qoyulmalıdır".

Röyalə Xəyal

Telegramda izləyin