Nigeriyada məşhur aktrisa 26 yaşında öldü

"Nimmi Ferrari" təxəllüsü ilə məşhurlaşan nigeriyalı aktrisa Adesanya Nimota Omotolani 26 yaşında ölüb.

Oxu.Az xəbər verir ki, bu barədə aktrisanın ailə üzvlərinə istinadən Böyük Britaniyanın "Need To Know" portalı xəbər yayıb.

Məlumata əsasən, gənc sənətçi sentyabrın 6-da dünyasını dəyişib. Aktrisanın bacısının sözlərinə görə, onun səhhəti qəflətən pisləşib və tibb işçilərinin səylərinə baxmayaraq, həyatını xilas etmək mümkün olmayıb. Ölümün dəqiq səbəbi hələlik ictimaiyyətə açıqlanmayıb.

Rəsmi olaraq təsdiqlənməyən mənbələrdən əldə edilən məlumatlarda bildirilir ki, Omotolaninin ölümündən bir müddət əvvəl cərrahi əməliyyat keçirməsi iddiası var.

Qeyd edək ki, "Nimmi Ferrari" daha çox yoruba dilində çəkilmiş filmlərdəki rolları ilə populyarlıq qazanmışdı. O, şəxsi prodüser şirkətini idarə etməklə yanaşı, kino sənayesinin məşhur nümayəndələrindən müsahibələr aldığı xüsusi bloq da aparırdı. Bunlardan əlavə, Omotolani "TikTok" sosial şəbəkəsində 310 mindən artıq izləyicisi olan tanınmış influenser kimi fəaliyyət göstərirdi.

Telegramda izləyin