Ərdoğanın zəngindən sonra nələr dəyişəcək? - Ekspertdən AÇIQLAMA

"Türkiyə Prezidenti Rəcəb Tayyib Ərdoğanın Azərbaycan Prezidenti İlham Əliyevə telefon zəngi iki ölkə arasında yaranmış narazılıqların aradan qaldırılması baxımından əhəmiyyətli ola bilər. Əslində, belə bir zəngin və ya görüşün baş tutması gözlənilən idi. Təmasın Türk Dövlətləri Təşkilatının oktyabrın son günlərində keçiriləcək zirvə toplantısına qədər reallaşması müsbət addımdır. Çünki sammitə qədər iki ölkə arasındakı münasibətlərin yaxşılaşmasına ehtiyac var idi".

Bu fikirləri Sonxeber.az-a açıqlamasında siyasi şərhçi Aydın Quliyev bildirib.
"Türkiyə-Azərbaycan münasibətləri yalnız iki ölkə üçün deyil, Türk Dövlətləri Təşkilatı üçün də böyük əhəmiyyət daşıyır. Azərbaycanla Türkiyə arasında normal münasibətlər olmazsa, təşkilatın bütövlükdə struktur kimi inkişaf etməsi çətinləşə bilər. Son hadisələr fonunda bunun ilk əlamətlərini də gördük. Bakıda keçirilən AQEM konfransında Hakan Fidanın zalı tərk etməsindən sonra Mərkəzi Asiyanın dörd türk dövlətinin nümayəndələrinin tədbirdə qalması müəyyən nəticələr çıxarmağa əsas verir. Bu, Azərbaycan-Türkiyə münasibətlərində gərginlik davam edərsə, Türk Dövlətləri Təşkilatında birliyin təhlükə altına düşə biləcəyini göstərir. Belə vəziyyətdə Mərkəzi Asiya ölkələrinin fəaliyyətlərini daha çox Azərbaycanla əlaqələndirməyə çalışmaları da mümkündür.

Ərdoğanın telefon zəngindən sonra iki ölkə arasında münasibətlərin əvvəlki mərhələyə qayıtması ehtimalı artıb. Bununla belə, Türkiyədə hakim Ədalət və İnkişaf Partiyası (AKP) tərəfindən Azərbaycanın daxili işlərinə müdaxilə cəhdlərinin təkrarlanmayacağına təminat verilməlidir. Çünki əvvəlcə Türkiyənin sosial şəbəkə seqmentində Azərbaycana müdaxilə cəhdlərinin şahidi olduq, daha sonra isə rəsmi strukturlar səviyyəsində də bəzi zərərli addımlar müşahidə edildi. Hətta Prezident Ərdoğanın yaxın çevrəsində olan şəxslər də Azərbaycanın daxili işlərinə müdaxilə etməyə cəhd göstərdilər.

Telefon danışığından sonra bu cür müdaxilə cəhdlərinin dayanacağını ehtimal etmək olar. Lakin burada üç vacib məqam var. Birincisi, Türkiyədə hakimiyyətdə, xüsusilə Ərdoğanın yaxın çevrəsində və rəsmi strukturlarda təmsil olunan şəxslərin Azərbaycanın daxili işlərinə müdaxilə cəhdləri təkrarlanmamalıdır. İkincisi, indiyədək baş vermiş müdaxilə cəhdlərinə münasibətdə müvafiq qiymətləndirici reaksiyalar verilməlidir. Üçüncüsü isə Türkiyə hakimiyyəti sosial şəbəkələrin Türkiyə seqmentində Azərbaycana qarşı bu cür hücumların səngidilməsi istiqamətində nəzarəti gücləndirməlidir.

Əgər bu üç istiqamətdə addımlar atılarsa, Türkiyə-Azərbaycan münasibətlərinin əvvəlki səviyyəyə qayıtması ehtimalı daha real görünəcək. Hər halda, proseslərin necə inkişaf edəcəyini zaman göstərəcək".

Röyalə Xəyal

Telegramda izləyin