Fars körfəzində neft tankeri hücuma məruz qalıb - Gərginlik artır

Fars körfəzində Qətər sahilləri yaxınlığında neft tankeri iki naməlum mərmi ilə vurulub.

Associated Press-in məlumatına görə, hadisə noyabrın 5-də Qətərin şimal sahillərindən təxminən 50 dəniz mili məsafədə baş verib. Böyük Britaniyanın Dəniz Ticarət Əməliyyatları Mərkəzi tankerin hücuma məruz qaldığını təsdiqləyib.

Hadisədən sonra gəminin heyətinin vəziyyəti, tankerin aldığı ziyanın miqyası və mümkün ekoloji nəticələr barədə ətraflı məlumat açıqlanmayıb. Hücuma görə məsuliyyəti hələlik heç bir tərəf üzərinə götürməyib.

Sonxeber.az Associated Press-ə istinadən xəbər verir ki, bununla yanaşı, İran dövlət televiziyası Hörmüz boğazında iki neft tankeri və bir yedək gəmisinin dəniz minalarına düşməsi nəticəsində yanğın baş verdiyini bildirib. Lakin bu məlumat müstəqil mənbələr tərəfindən təsdiqlənməyib.

Qeyd edək ki, Hörmüz boğazı dünya enerji bazarı üçün strateji əhəmiyyət daşıyan əsas dəniz marşrutlarından biridir. ABŞ və İran arasında davam edən müharibə fonunda bölgədə gəmiçilik təhlükəsizliyi ilə bağlı narahatlıqlar daha da artıb.

Müəllif: İlkin Məmmədkərimov

Telegramda izləyin