Rusiya İrana 90 ədəd müasir raket buraxılış qurğusu verəcək: Moskvanın hərbi dəstəyi üzə çıxdı

Rusiya İranın hərbi imkanlarını gücləndirmək məqsədilə Tehrana 90 ədəd müasir raket buraxılış qurğusu tədarük etməyə razılaşıb. Bu barədə "Financial Times" nəşri Rusiyanın müdafiə sənayesinə aid əvvəllər açıqlanmamış sənədlərə istinadən məlumat yayıb.

Nəşrin məlumatına görə, 2024-2025-ci illəri əhatə edən istehsal sənədlərində İran üçün nəzərdə tutulan 90 ədəd APU-L tipli raket buraxılış qurğusunun sifarişi əks olunub. Sənədlərdə alıcı "K-10" kod adı ilə göstərilib. Rusiyanın dövlət silah ixracatçısı "Rosoboronexport" bu koddan İranı ifadə etmək üçün istifadə edir.

Söhbət Rusiya istehsalı olan LMUR (İzdeliye 305) adlı yüksək dəqiqlikli idarəolunan raketlər üçün nəzərdə tutulan qurğulardan gedir.

Sonxeber.az Financial Times-a istinadən xəbər verir ki, bu raketlər hərəkətdə olan hədəfləri vurmaq imkanına malikdir və Rusiya ordusu tərəfindən Ukraynada geniş istifadə olunur.

Məlumata əsasən, APU-L qurğuları əsasən Mi-28 hücum helikopterlərində istifadə üçün nəzərdə tutulub və hər biri iki raket daşıya bilir. İranın da Rusiyadan Mi-28 helikopterləri aldığı bildirilir.

LMUR raketlərinin uçuş sürəti saniyədə təxminən 230 metrdir. Bu göstərici raketin 14 kilometr məsafəni təxminən bir dəqiqəyə qət etməsinə imkan verir.

Bununla belə, "Financial Times" qeyd edir ki, açıqlanan sənədlər raket buraxılış qurğularının İran üçün sifariş edildiyini təsdiqləsə də, onların faktiki olaraq Tehrana çatdırılıb-çatdırılmadığını müəyyən etmir.

Nəşrin qiymətləndirməsinə görə, bu razılaşma Rusiya ilə İran arasında hərbi-texniki əməkdaşlığın genişləndiyini göstərir. Moskvanın Tehrana dəstəyi isə regiondakı hərbi balans və təhlükəsizlik məsələləri baxımından diqqət çəkir.

Müəllif: İlkin Məmmədkərimov

Telegramda izləyin