Çin Sakit okeanda genişmiqyaslı hərbi təlimlər keçirib - Tayvan narahatdır

Çin noyabrın əvvəlində Qərbi Sakit okean və Tayvan ətrafında əvvəlcədən elan edilməmiş genişmiqyaslı hərbi təlimlər keçirib. Təlimlər zamanı Çin Hərbi Dəniz Qüvvələri və Sahil Mühafizəsinə məxsus 100-dən çox gəmi bölgədə fəaliyyət göstərib.

Bu barədə "Reuters" agentliyi Tayvanın təhlükəsizlik qurumlarındakı mənbələrə istinadən məlumat yayıb.

Tayvan rəsmilərinin bildirdiyinə görə, təlimlər çərçivəsində digər ölkələrin hərbi qüvvələrinə, eləcə də Tayvan şəhərlərinə hücum ssenariləri məşq edilib. Çin hərbi qüvvələrinin şərq, şimal və cənub əməliyyat komandanlıqlarının koordinasiyalı şəkildə fəaliyyət göstərməsi diqqət çəkib.

Tayvan rəsmiləri bu hərəkətləri Pekinin adaya və digər hökumətlərə qarşı "səssiz təzyiq" siyasətinin tərkib hissəsi kimi qiymətləndiriblər. Onların fikrincə, Çin açıq şəkildə hərbi əməliyyat elan etmədən bölgədə hərbi gücünü nümayiş etdirir.

Məlumata görə, Çin sualtı qayığı Sarı dənizdən materik istiqamətində qitələrarası ballistik raket də buraxıb. Bununla belə, Çin Müdafiə Nazirliyi təlimlərlə bağlı Reuters-in sorğusuna cavab verməyib.

Sonxeber.az Reuters-ə istinadən xəbər verir ki, Tayvanın təhlükəsizlik rəsmiləri noyabrın 13-də bölgədəki Çin gəmilərinin sayının təxminən 70-ə qədər azaldığını, lakin "Liaoning" aviadaşıyıcı zərbə qrupunun və Çin hərbi aviasiyasının fəallığının davam etdiyini bildiriblər.

Qeyd edək ki, Pekin Tayvanı öz ərazisinin bir hissəsi hesab edir və ada üzərində suverenlik iddiasını irəli sürür. Tayvan hökuməti isə bu iddianı qəbul etmir. Çin gələn həftə Şençjendə keçiriləcək Asiya-Sakit Okean İqtisadi Əməkdaşlıq Təşkilatının (APEC) sammitinə ev sahibliyi edəcək. Tədbir çərçivəsində ABŞ Prezidenti Donald Tramp və Çin lideri Si Cinpinin görüşü də gözlənilir.

Müəllif: İlkin Məmmədkərimov

Telegramda izləyin