Putin xərçənglə mübarizə aparan məşhur bloqeri əfv etdi

Rusiya Prezidenti Vladimir Putin xərçənglə mübarizə aparan və ölkə xaricinə qanunsuz çoxmilyonluq köçürmələrlə bağlı iş üzrə şərti cəzaya məhkum edilən məşhur rusiyalı bloqer Lerçekin (əsl adı Valeriya Çekalina) əfv edilməsi ilə bağlı fərman imzalayıb.

Oxu.Az-ın TASS-a istinadən xəbərinə görə, müvafiq sənəd rəsmi hüquqi məlumat portalında dərc edilib.

"Humanitar prinsipləri rəhbər tutaraq, fərman verirəm: 1992-ci il təvəllüdlü Valeriya Valeryevna Çekalina əfv edilsin, Moskvanın Qaqarinski Rayon Məhkəməsi tərəfindən 31 iyul 2026-cı ildə təyin edilmiş cəzadan azad edilsin və cinayət qeydləri silinsin. Bu fərman imzalandığı gündən qüvvəyə minir", - deyə sənəddə bildirilib.

Daha əvvəl Moskva məhkəməsi bloqerin dördüncü mərhələ mədə xərçənginin müalicəsi üçün Çinə getmək tələbini rədd etmişdi.

Bloqerin vəkili Konstantin Tretyakov daha əvvəl bildirmişdi ki, müvəkkili Rusiya prezidentinə əfv edilməsi üçün müraciət ərizəsi yazıb.

Xatırladaq ki, Lerçek və keçmiş ərinə qarşı cinayət işi 2024-cü ilin oktyabr ayında açılıb. Keçmiş ər-arvad, eləcə də onların partnyorları Roman Vişnyak saxta sənədlərdən istifadə edərək Rusiyadan Dubaya 250 milyon rubldan çox pul köçürməkdə şübhəli bilinirdilər.

İyulun 31-də məhkəmə Çekalinanı təqsirli bilib və barəsində beş il şərti azadlıqdan məhrumetmə cəzası çıxarıb. Bloqerin üzərinə həmçinin 763 milyon rubl dəyərində cərimənin ödənilməsi öhdəliyi qoyulub. Lerçekin keçmiş əri Artem Çekalin yeddi il koloniya cəzasına məhkum edilib. O, məhkəmə zalında həbsxanaya aparılıb.

Məhkəmə Lerçekin işi üzrə dinləmələri iyulun 25-də bərpa edib. Daha sonra, iyulun 28-də işin yeni federal hakimə verildiyi məlum olub. İyulun 30-da bloqer uzun sürən xəstəlikdən sonra ilk dəfə məhkəmə qarşısına çıxıb. Məhkəmə iclası qapalı rejimdə keçirilib.

24 fevral 2026-cı ildə Çekalina argentinalı xoreoqraf Luis Skviççiarini ilə birlikdəliyindən dördüncü uşağını dünyaya gətirib. Xəstəxanadan çıxdıqdan bir gün sonra o, xəstəxanaya yerləşdirilib, rəqqas isə bildirib ki, Lerçekə metastazlarla dördüncü mərhələ mədə xərçəngi diaqnozu qoyulub, bundan sonra Lerçek kimyaterapiya aldığını deyib.

Martın 16-da bloqer ev dustaqlığından azad edilib və cinayət işi üzrə məhkəmə prosedurları dayandırılıb. İyulun 24-də dövlət ittihamı Lerçekin işi üzrə məhkəmə prosesinin bərpa edilməsini və onun Sankt-Peterburqa səfəri ilə əlaqədar ev dustaqlığına göndərilməsini istəyib.

Telegramda izləyin