"40 il ərzində müəllimin əli-qolu bu qədər bağlanmamışdı" - Təhsil eksperti

İstiqamət: elmi-kütləvi, mədəni-maarif, təhsil proqramlarının hazırlanması

Son zamanlar təhsil müəssisələrində zorakılıq, bıçaqlanma halları çoxalıb. Bunun səbəbi nədir və qarşısını necə almaq olar?

Mövzuyla bağlı Sonxeber.az-a təhsil eksperti Elşən Qafarov açıqlama verib.

O bildirib ki, istənilən təhsil müəssisəsində intizam qaydaları həmin müəssisənin nizamnaməsi ilə müəyyən olunur:

"Vaxtaşırı həmin intizam qaydalarına riayət olunması ilə bağlı maarifləndirici tədbirlər keçirilir. Təəssüf ki, bizim məktəblərimizin ümumiyyətlə nizamnaməsi yoxdur. Ali təhsil müəssisələrimizin nizamnaməsi isə çox bəsitdir. Ali təhsil müəssisələrində təhsil alanlar yetkin insanlar sayılır. Məktəbdə təhsil alanlar isə yetkinlik yaşına çatmayanlardır və onların tərbiyələnməsi üçün ciddi işlər görmək lazımdır.

Son illər bullinqlə mübarizəyə qarşı tədbirlər keçirilir. Bu tədbirlər çox zaman əks təsir verir. Müəllimlər intizam qaydalarını pozan şagirdləri cəzalandırarkən videoya çəkilir və ictimailəşdirilir. Nəticə etibarilə, müəllimlər işlərini itirməməkdən ötrü şagirdlərə bir söz deməyə çəkinirlər. Valideynlər də təhsildəki bütün neqativ halların səbəbkarı kimi müəllimləri görürlər. 40 il ərzində müəllimin nüfuzu bu qədər aşağı düşməmiş və əli-qolu bu qədər bağlanmamışdı.

Xüsusilə ümumi təhsil məktəblərində bu halın baş verməsi ürəkağrıdıcıdır. Problemi həll etmək üçün məktəb nizamnaməsi qəbul olunmalıdır. Nizamnaməni pozan şagird və valideynlərə qarşı hansı hüquqi addımların atılacağı barədə məlumat verilməlidir.

Təhsili idarəetmə qurumlarının da vəzifəsi baş verən və ya baş verə biləcək hadisələrlə bağlı məktəb rəhbərliyinin nizamnamə əsasında hansı addımlar atdığına nəzarət etməkdir. Belə olan halda neqativ hallar minimuma enəcək və ya aradan qalxacaq".

Material Azərbaycan Respublikasının
Medianın İnkişafı Agentliyinin maliyyə
dəstəyi ilə hazırlanmışdır.
Şəbnəm Lətifi

Telegramda izləyin